स्थानीयतय्सं मोदी आयोजना ठप्प यानाबिल

येँ – स्थानीयवासीया अवरोधया कारणं चौधरी समूहलं दयेकाच्वंगु मध्यमोदी जलविद्युत आयोजना दयेकेगु निंतिं दिउगु दु । नीयवासीतय्सं आयोजनाया ज्याकुथिइ तालं ग्वयाः पनाबिइवं आइतवाः निसें आयोजनाया ज्या दिउगु खः । सुरुङ्ग दयेकेगु निंतिं बम विस्फोट याःबलय् स्थानीय वस्ती जोखिमय् लाःगु धासें आयोजनाया ज्याकुथिइ तालं वया बिउगु खः ।

बम विस्फोट याःबलय् स्थानीयवासीया झिंखुखा छेँय् क्षति जूगु खँ धाःगु दु । थ्व आयोजना मोदी गाउँपालिका २ देउपुरय् दयेकाच्वंगु खः । बम विस्फोट लिपा छेँ दुना वःगु धासें स्थानीयवासीं जिल्ला प्रशासन कार्यालयय् नं उजुरी तःगु खः । तर छुं सुनुवाइ मजूगुलिं तालाबन्दी यानाबिइमाःगु खँ स्थानीयवासीतय्सं धाःगु दु ।

आयोजना प्रमुख निरञ्जन राउतं छेँ दुना वःगु आयोजनाया कारणं मखुसें २०७२ सालया भुखाचं क्षति यानातःगु कारणं खः धयादीगु दु । वय्कलं आयोजनां यानाः छेँय् क्षति जूगु खःकि मेगु हे कारणं जूगु खँ धयागु विशेषज्ञ हयाः जाँच याकेगु खँ धयादीगु दु ।

आयोजना प्रमुख राउतं स्थानीयवासीतय्सं मुआब्जा म्हो जक बिउगु धकाः आः वयां ज्याय् पंगः थं वयाच्वंगु खँ धयादीगु दु । चौधरी समूहं दयेकाच्वंगु थ्व आयोजना १५.१ मेगावाट क्षमताया खः । थुकिया थ्यंमथ्यं ६० प्रतिशत ज्या क्वचायेधुंकूगु दु ।