मिस नेवाः पोखराया तयारी शुरु

येँ- नेवाः खलः कास्कीया ग्वसालय् दँय्दसं थें थुगुसी नं नेवाः मिसातय् प्रतिभायात न्ह्यब्वयेकथं ‘मिस नेवाः पोखरा–११३८’ जुइगु जूगु दु । खलःया ग्वसालय् थुगुसी जुइत्यंगु थ्व च्याक्वःगु संस्करण खः । नेपाल संवत् ११३१ निसें थुकथंया कासा दँय्दसं जुया वयाच्वंगु दु ।

विशेषतः पोखराय् च्वना वयाच्वंपिं नेवाः मिसातय्त भाषा, कला, संस्कृति, नसात्वँसा, तिसावसःया नापं स्वास्थ्य, शिक्षा, सिप आदिया बारे जानकारी बीगु व इमिके दुगु व्यक्तित्व व प्रतिभायात समाजया न्ह्यःने पित हयेगु ल्याखं थुकथंया कासा याना वयाच्वनागु कासाया सह मूल संयोजक विमल श्रेष्ठं ‘नेपालभाषा टाइम्स’यात कनादीगु दु ।

थुकथंया कासाया आयोजना वास्तवय् मिसातय्के सुलाच्वंगु प्रतिभायात न्ह्यःनेगु उद्देश्यं जक याना वयाच्वनागु जूगुलिं थुकी छुं कथंया व्यवसायीक उद्देश्य मदुगु वय्कलं प्रष्ट यानादीगु दु ।

कासा सम्बन्धी जानकारी बीगु ल्याखं ग्वसाः ग्वःगु पत्रकार सम्मेलनय् च्यादँ न्ह्यःनिसें थुकथंया कासा याना वयाच्वनागुलिइ थुगुसी ब्वति काइपिनिगु ल्याः धाःसा छुं भचा म्हो खने दयाच्वंगु खःसां नां दुथ्याकेगु लिपांगु न्हि तकया दुने ब्वति काइपिनिगु ल्याः अप्वःगु ग्वसाः खलकं अनुमान याःगु दु ।

थुगुसीया कासा तयारीया निंतिं भाजु गजेन्द्रमान श्रेष्ठया मूल संयोजकत्वय् छगू कमिटी नं गठन याःगु दु । कासाय् पोखरालिसें देय्न्यंकंया १८ दँ निसें २२ तक दुपिं मिसापिंसं ब्वति काये फइगु व्यवस्था दुगु सह संयोजक श्रेष्ठं जानकारी बियादीगु दु । नां दर्ता यायेगु अन्तिम न्हि माघ १५ गते तक खःसा वयां कन्हय्कुन्हु ‘अडिसन’ लिपा छनौट जूपिंत माघ १८ गतेनिसें कोरियोग्राफी, नेवाः संस्कृति, भाषा कलाया बारे प्रशिक्षण बीगु, स्वास्थ्य, शिक्षा, सीपया नापं पोखराया भौगोलिक स्थितिया बारे प्रशिक्षण बीगु नापं आवश्यक जुल धाःसा येँय् नं प्रशिक्षक सःता तालिम बीगु व येँय् नं थीथी थासय् भ्रमण याकेगु ग्वसाः दुगु वय्कलं कनादीगु दु ।

चैत ३ गते पोखरा सभागृहय् जुइगु कासाय् मुख्य उपाधि, फस्ट रनरअप, सेकेन्ड रनरअप नापं थीथी विधाय् नं विजेता जूपिंत सिरपाःया व्यवस्था यानातःगु दु ।

सम्बन्धित बुखँ

LEAVE YOUR COMMENTS