जामनः गुभाजुयात उत्कृष्ट संकिपालिसें स्वंगू अवार्ड

येँ- नेपाल आदिवासी चलचित्र (निफ्फ) अवार्डय् नेपालभाषाया ऐतिहासिक संकिपा ‘जामनः गुभाजुं’ उत्कृष्ट संकिपाया अवार्ड त्याकेत ताःलाःगु दु । २७ क्वःगु विश्व आदिवासी जनजाति दिवसया लसताय् नेपाल आदिवासी जनजाति महासंघ अमेरिका (फिप्ना)या ग्वसालय् जूगु अवार्ड ज्याझ्वलय् जामनः गुभाजु संकिपां उत्कृष्ट संकिपालिसें उत्कृष्ट पटकथा व उत्कृष्ट अभिनेताया अवार्ड नं ल्हातय् लाकेत ताःलाःगु दु ।

अवार्डया जामनः गुभाजु गुंगू विधामध्ये च्यागुलिइ नोमिनेट जूगु खःसा स्वंगू विधाय् अवार्ड त्याकेत ताःलाःगु खः । उत्कृष्ट संकिपालिसें उत्कृष्ट पटकथा व अभिनेताकथं सुशील राजोपाध्यायं अवार्ड त्याकादीगु खः ।

अमेरिकाया न्यूयोर्क सहरय् वंगु अगस्ट २१ तारिखकुन्हु जूगु अवार्ड ज्याझ्वलय् जामनं गुभाजुं १,१११ अमेरिकी डलरसहित उत्कृष्ट संकिपाया अवार्ड त्याकेत ताःलाःगु खः ।
नेपाल आदिवासी जनजाति महासंघ अमेरिकाया अध्यक्ष लोक चेम्जोङ व न्यूयोर्कस्थित नेपाली महावाणिज्य दूत विष्णुप्रसाद गौतमं मंकाः कथं लःल्हानादीगु सिरपाः नेवाः गुथि युएसएया पदाधिकारीतय्सं लःल्हाना कयादीगु खः ।

विश्व आदिवासी जनजाति दिवसया लसताय् फिप्नापाखें आदिवासी जनजातिया तिसा वसः, भेषभुषा, संस्कृति, रीतिथिति, रहनसहन आदिया संरक्षण व संवद्र्धन यायेगु तातुनाः ग्वसाः ग्वःगु अवार्ड ज्याझ्वलय् थीथी झिगू विधाय् अवार्ड वितरण याःगु खः ।

ज्याझ्वलय् उत्कृष्ट नायिकाया अवार्ड मगः भाय्या ‘ट्याङचालपाखें तिला मगर, उत्कृष्ट बाखं लिम्बु भाय्या संकिपा ‘के’, उत्कृष्ट छाँयाकन व स्वकुमिपिंत यःगु ह्योल्मो भाय्या ‘मेटोक’ उत्कृष्ट निर्देशक व संगीतया अवार्ड गुरुङ भाय्या ‘मि होर्वेट’ व उत्कृष्ट भेषभुषाया अवार्ड तामाङ भाय्या ‘प्राङ्नां’ त्याकेत ताःलाःगु दु । अवार्ड वितरण ज्याझ्वलय् थीथी आदिवासी जनजातिया संस्कृति पिज्वइकथंया म्येँ, हुलाप्याखं नं न्ह्यब्वःगु खः ।