ने. सं. ११४३ चौलाथ्व पारू -

पालंपाः साहित्यिक ज्याझ्वःया निंतिं सहलह

ख्वप- म्होतिं नं निलाय् छक्वः छगू साहित्यिक ज्याझ्वः न्ह्याकेगु ल्याखं सहलह जूगु दु । थनया साहित्यलिसे सरोकारा दुगु थीथी संस्थाया दथुइ जूगु सहलह मुँज्यां म्होतिं नं निलाय् छक्वः साहित्यिक ज्याझ्वःयायेगु ल्याखं सहलह जूगु खः ।

विराट नेपालभाषा साहित्य सम्मेलनया कुतलय् नेपाल साहित्य मन्दिर, न्ह्यज्या खलः, सिद्धिदास प्रतिष्ठान, रामशेखर लुमन्ति दबू, याताजः, भक्तपुर साहित्यिक समाज थेंज्याःगु साहित्यिक व साहित्यलिसे सरोकार दुगु संस्थाया प्रतिनिधि दथुइ म्होतिं नं निलाय् छक्वः पालंपाः साहित्यिक ज्याझ्वः यायेगु खँय् सहलह जूगु खः । छगू धलः हे दयेकाः साहित्यिक ज्याझ्वः यायेगु खँय् सहलह जूगु खः ।

विधागत रुपं साहित्यिक ज्याया लागाकथं साहित्यक ज्याझ्वः उकिया समीक्षा, समालोचना, ईया आवश्यकता व मागकथं साहित्यया थीथी विषयय् विधागत रुपं गोष्ठि, न्हू पुस्तायात साहित्यप्रति अनुराग ब्वलंकेगु, साहित्य सिर्जनाया विषयय् प्रशिक्षण, नेपाल लिपिया प्रशिक्षया, भाषा महारथीपिनिगु बुदिं हनेगुनापं मेमेगु विषययात नं ज्याझ्वलय् दुथ्याका यंकेगु खँय् सहलह जूगु खः ।

थुकथंया ज्याझ्वः यायेबलय् सरोकारवाला संस्थापाखें याना वयाच्वंगु थःपिनिगु नियमित ज्याझ्वःया लिच्वः मलाइकथं ज्याझ्वःया व्यवस्थापन यायेगु, छगू संस्थाया ग्वसाः पाः लाइगु इलय् मेमेगु खलः, पुचलं नं ब्वति कायेगु, विषयगत आवश्यकता कथं ज्याझ्वः यायेगु व ज्याझ्वः यायेबलय् मल्वाइकथं वा छगू हे प्रकृतिया ज्याझ्वः मयायेगु विषयय् सहलह जूगु खः ।

आःयात थुकथंया साहित्यिक ज्याझ्वः यायेगु बारे सहलह जूगु खःसां सरोकारवाल संस्थाय् सहलह ब्याकेधुंकाः जक ज्याझ्वःया धलः तयार यायेगु खँ क्वःछिउगु दुसा बाःछि लिपा च्वनीगु मेगु मुँज्यां थ्व बारे निर्णय जुइगु खँ धाःगु दु ।