ल्हुतिया जात्रा नं स्थगित

येँ (रासस) – ल्हुति पुन्हि कुन्हु ल्हुति (बालाजु)इ जुइगु जात्रा नं स्थगित जूगु दु । कोरोना भाइरस संक्रमणया ग्याःचिकुं कन्हय् बुधवाः ल्हुतिइ जुइगु जात्रा स्थगित याःगु खः । बालाजु बाइसधाराया मू द्यःपाःला थकाली धनलाल महर्जन द्यःयाथाय् द्यः पुज्यायेगु जक ज्या जुइगु खँ धयादीगु दु ।
राज्यमन्त्री रामवीर मानन्धरं नं सदियौं न्ह्यव निसें न्ह्यानाच्वंगु थ्व जात्रा थुगुसी स्थगित यायेमाःगु खँ धयादीगु दु । मन्त्री मानन्धरं ल्हुतिइ हे च्वनादीम्ह खः । वय्कलं थ्व जात्रा इतिहासय् हे न्हापांखुसी दिकेमाःगु खँ धयादिसें नित्य पुजा व जात्राबलय् यायेमाःगु मेमेगु पुजा जक जुइगु खँ धयादिल ।
ल्हुति पुन्हि कुन्हु बालाजुया नीनिधाः हिति (बाइसधारा)य् म्वः ल्हुयाः मदयेधुंकूपिं थःथितिपिनि नामय् मत बीगु परम्परा नं दु । थुकुन्हु नुवाकोटया कडल्चोक भगवतीयात नं बालाजुइ हयाः थनच्वंगु तुयुगु फल्चाय् तयाः हवन यानाः म्ये बलि बीगु याइगु खः । मनमैजुया जात्रा लिसे नं बालाजु बाइसधाराया प्रसंग स्वानाच्वंगु दु । ल्हुति पुन्हिया मेला लिसें मनमैजुया जात्रा नं सुरु जुइगु परम्परा दु । थुकुन्हु बालाजुइ म्वः ल्हुयाः मनमैजुया दर्शन यात धाःसा मनोकामना पूवनीगु धार्मिक विश्वास दु । ल्हुति पुन्हि कुन्हु जामाच्व वनेगु परम्परा नं दु ।