पल शाहया पक्षय् जुयाच्वंगु प्रदर्शनप्रति आपत्ति
येँ – बलात्कार सम्बन्धी द्वपनय् प्रहरी हिरासतय् लानाच्वंम्ह कलाकार पल शाह प्रकरणय् पक्ष व विपक्षय् प्रदर्शन यानाच्वंगु खँय् राष्ट्रिय मानव अधिकार आयोग व महिला आयोगं आपत्ति प्वंकूगु दु ।
थ्व झ्वलय् राष्ट्रिय मानवअधिकार आयोगं थ्व प्रकरणय् पक्ष व विपक्षय् प्रदर्शन यायेगु, अभिव्यक्ति बीगु, प्रचारबाजी यायेगु ज्या मयायेत इनाप याःगु दु । अनुसन्धान प्रक्रिया न्ह्यानाच्वंगु इलय् थज्याःगु ज्याखँ यायेबलय् आरोपित व पीडित निगुलिं पक्षया गोपनीयता व मर्यादाय् आँच लाइगु खँ नं आयोगं धाःगु दु ।
आयोगया सहायक प्रवक्ता लोकनाथ वास्तोलां म्हिगः छगू वक्तव्य पिकासें सम्बन्धित मनूया अनुमति मकासे भिडिया रेकर्ड मयायेत व भिडियोत सार्वजनिक मयायेत इनाप यासें अतिप्रचारका कारणं प्रमाणत नष्ट जुइ फइगु खँ धयादीगु दु ।
थज्याःगु गतिविधिं नेपाःया संविधानया धारा २८ या गोपनीयताया हक व धारा २० य् न्ह्यथनातःगु न्यायसम्बन्धी हक, मुलुकी फौजदारी संहिताया दफा २९८, मानवअधिकारया विश्वव्यापी घोषणापत्र, १९४८ या धारा १२ व नागरिक तथा राजनीतिक अधिकारसम्बन्धी अन्तर्राष्ट्रिय महासन्धिया धारा १७ य् व्यवस्था यानातःगु गोपनीयताया अधिकारसमेत प्रभावित जुइगु खँ नं उकी धयातःगु दु ।
अथे हे राष्ट्रिय महिला आयोगपाखें नं छगू विज्ञप्ति पिकासें पल शाह प्रकरणय् हुलहुज्जत यायेगु ज्या जुयाच्वंगुलिं न्याय निरुपणय् लिच्वः लाये फइगु खँ धाःगु दु । थ्व प्रकरणय् अनुसन्धान ज्यायात प्रभावित याये कथंया गतिविधित जुयाच्वंगु कारणं अज्याःगु ज्या मयायेत नं आयोगं इनाप याःगु दु ।
आयोगया प्रवक्ता चमिला भट्टराईं पितबिउगु विज्ञप्तिइ पल शाह विरुद्ध छम्ह नाबालिकां जबर्जस्ती करणी विषयक जाहेरी दरखास्त बिउगु व उकिया बारे पत्रपत्रिका व सामाजिक सञ्जालय् नाबालिकायात थीथी द्वपं बीगु टिकाटिप्पणी याना हःगु खँय् आयोगया गम्भीर ध्यानाकर्षण जूगु खँ धयातःगु दु ।
अथे हे पुलांम्ह प्रधानमन्त्री डा. बाबुराम भट्टराईं नं आरोपितया पक्षय् जुयाच्वंगु प्रदर्शनप्रति आपत्ति प्वंकुसें अदालतं बीगुफैसलायात माने यायेत सकसितं इनाप यानादीगु दु ।
थ्व प्रकरणया पक्ष व विपक्षय् थौंकन्हय् नेपाःया कलाकारत नं विभाजित जुयाच्वंगु दु ।
LEAVE YOUR COMMENTS