
थिमि – भक्तपुर जिल्ला मानन्धर युवा संघया ग्वसालय् जूगु झिंस्वन्हुया क्षमता अभिवृद्धि तालिम क्वचाःगु दु ।समापन ज्याझ्वलय् नवासें संघया नायः न्हुछेरत्न मानन्धरं थज्याःगु तालिमं जिल्लाया थीथी थासय् च्वनाच्वंपिं मानन्धर समुदायया शैक्षिक, आर्थिक, सांस्कृतिक व कासा ख्यलय् क्षमता अभिवृद्धि यायेगुलिइ तिबः जू वनीगु विश्वास प्वंकादिल ।
थःपिंसं समुदायया क्षमता अभिवृद्धिया लक्ष्य कयागु दु धासें वय्कलं धयादिल, ‘संस्थागत प्रोत्साहन बियाः फरक पेशा व व्यवसायय् लगे जुयाच्वंपिं मानन्धरतय् जीवनस्तर सुधारया निंतिं कुतः यायेगु जुइ’, अध्यक्ष मानन्धरं धयादिल ।नेपाल मानवअधिकार संगठन ख्वपया अध्यक्ष रामकृष्ण मानन्धरं प्रस्तुति शैली आवश्यक जूगु विषयय् थःगु विचाः तयादीगु खः ।
ज्याझ्वलय् राष्ट्रिय अनुसन्धान विभागपाखें अवकास कयादीम्ह रत्न साय्मि, नवरत्न स्कुलया प्राचार्य सुरेन्द्र श्रेष्ठ, सिवाः साय्मि खलःया नायः अष्टरत्न मानन्धर लगायत थीथी संघसंस्थाया प्रतिनिधितय्सं नं थःथःगु विचाः तयादीगु खः ।राजेश मानन्धर व सुचित्रा मानन्धरया संयोजकत्वय् जूगु तालिम संचारकःमि केके मानन्धरं बियादीगु खःसा मेम्ह संचारकःमि नापं नांजाःम्ह म्येँ हालामि सुरजवीर वज्राचार्यं नं छन्हुया प्रशिक्षण बियादीगु खः ।
न्हिं निघौया ल्याखं संचालन जूगु तालिमय् राजनीतिज्ञ, चिकित्सक, घरेलु तथा साना उद्योगी, इन्जिनियरिङया विद्यार्थीनिसें गृहिणी, मस्तय् सहभागिता दुगु खः ।
LEAVE YOUR COMMENTS