स्वनिगलय् कोरोना संक्रमितया न्हूगु रेकर्ड

येँ (नेपालभाषा टाइम्स) – कोरोना भाइरसया संक्रमण जूपिनि ल्याः म्हिगः न्हूगु रेकर्ड कायम जूगु दु । म्हिगः स्वनिगलय् म्हिगः जक ३ हजार १०७ म्ह न्हूपिं कोरोना भाइरस संक्रमित पुष्टि जूगु दु । थ्व स्वनिगलय् कोरोना संक्रमित जूपि मध्ये दकलय् अप्वः खः । मन्त्रालयया प्रवक्ता डा. जागेश्वर गौतमया कथं येँय् जक २ हजार ३९१, यलय् ५४३ व ख्वपय् जक १७३ म्ह संक्रमित पुष्टि जूगु खः । लिपांगु इलय् २० हजार ११८ म्हेसिया पीसीआर परीक्षण याःगु खः ।

म्हिगः जक देय्न्यंकं ५ हजार ७४३ म्ह कोराना संक्रमित पुष्टि जूगु खँ स्वास्थ्य मन्त्रालयं धाःगु दु। देय्न्यकं संक्रमण पुष्टि जूपिं नं म्हिगः रेकर्ड न्हूगु कायम जूगु खँ मन्त्रालयं धाःगु दु। उकथं हे म्हिगः जक कोराना संक्रमण २ हजार ९९६ मुक्त जूगु दु । आः तक नेपालय् संक्रमितया ल्याः १ लाख ४४ हजार ८७२ थ्यंगु दुसा कोरोना संक्रमणं मुक्त जूपिं ९९ हजार ६०५ थ्यंगु दु ।

लिपांगु इलय् देय्न्यकं सक्रिय संक्रमितया ल्याः ४४ हजार ४७६ म्ह थ्यंगु दु। आः तक पीसीआर बिधिं परीक्षण याःपिनिगु ल्याः १३ लाख ३४ हजार ८९७ म्ह थ्यंगु दु। म्हिगः जक २६ म्ह सीगु दुसा आः सीपिनिगु ल्याः ७७१ म्ह थ्यंगु दु । मोहनि नखःया झ्वलय् बजारय् चहल पहल अप्वया वनेवं संक्रमणया ल्याः नं अप्वया वनाच्वंगु आशंका विज्ञपिंसं याःगु दुसा थ्व ल्याः अझ अप्वया वनेफइगु धासें सतर्कता नालेत नं सम्बन्धित विज्ञपिसं ख्याच्वः बिउगु दु ।