ने. सं. ११४४ ञलाथ्व दशमी -

गुबलय् गुबलय् जुल नेपालय् विमान दुर्घटना

येँ (नेपालभाषा टाइम्स)÷ बुधवाः सुथय् सौर्य एयरया विमान त्रिभुवन विमानस्थलय् दुर्घटना जुल । दुर्घटनाय् लानाः झिंच्याम्ह सीगु दुसा विमान चालक मनिष शाक्य छम्ह जक बचे जूगु खः । थ्व लिसें नेपालय् वंगु ७० दँया दुने तःगू विमान दुर्घटना जूगु दु । नेपालय् सन् १९५५ निसें जूगु विमान दुर्घटना ः

सन् १९५५ ः सिमराय् कालिंगा एयरया विमान दुर्घटना जुयाः निम्हेसिया ज्यान वंगु खः ।
सन् १९५६ ः त्रिभुवन अन्तर्राष्ट्रिय विमानस्थलय् इन्डियन एयरलाइन्सया विमान दुर्घटना जुयाः झिंप्यम्हेसिया ज्यान वंगु खः ।
सन् १९५८ ः टिकाभैरवय् इन्डियन एयरलाइन्सया विमान दुर्घटना जुयाः नीम्ह मनूत सीगु खः ।
सन् १९६० ः भैरहवाय् शाही नेपाल वायुसेवा निगमया विमान दुर्घटना जूबलय् प्यम्हेसिया
ज्यान वन ।
सन् १९६२ ः नेपाल एयरलाइन्सया विमान ढोरपाटनय् दुर्घटना जूबलय् झिम्हसिया ज्यान वन ।
सन् १९६९ ः नेपाल एयरलाइन्सया विमान बतासे डाँडाय् दुर्घटना जुयाः ३५ म्हेसिया ज्यान वंगु खः ।
सन् १९७० ः रोयल फ्लाइट जोमसोमय् दुर्घटनाय् जूबलय् छम्हेसिया ज्यान वन ।
सन् १९७२ ः रोयल फ्लाइटया विमान धुलिखेलय् दुर्घटना जूबलय् स्वीछम्हेसिया ज्यान वंगु खः ।
सन् १९७५ ः नेपाल एयरलाइन्सया विमान येँया बौद्धय् दुर्घटना जूबलय् न्याम्हेसिया ज्यान वन ।
सन् १९७६ ः नेपाल एयरलाइन्सया विमान मेघौलीइ दुर्घटना जूबलय् खुम्हेसिया ज्यान वन ।
सन् १९७९ ः भिभिआइपी च्वनावंगु विमान लाङताङय् दुर्घटना जूबलय् खुम्हेसिया ज्यान वन ।
सन् १९८१ ः नेपाल एयरलाइन्सया विमान विराटनगरय् दुर्घटना जूबलय् झिम्हेसिया ज्यान वन ।
सन् १९८४ ः नेपाल एयरलाइन्सया विमान भोजपुरय् दुर्घटना जूबलय् झिंन्याम्हेसिया ज्यान वन ।
सन् १९८५ ः नेपाली सेनाया अधिकारीत च्वनावंगु विमान दुर्घटना जूबलय् २५ म्हेसिया ज्यान
वंगु खः ।
सन् १९९२ ः नेवाकोटया घ्याङफेदीइ थाइ एयरया विमान दुर्घटना जुयाः ११३ म्हेसिया ज्यान वन ।
सन् १९९२ ः यलया भट्टेडाँडाय् पाकिस्तान एयरलाइन्सया विमान दुर्घटना जुयाः १६७ म्हेसिया ज्यान वंगु खः ।
सन् १९९५ ः नेपाल एयरलाइन्सया विमान येँय् दुर्घटना जुयाः निम्हेसिया ज्यान वन ।
सन् १९९७ ः कर्णाली एयरया विमान सोलुखुम्बुइ दुर्घटना जूबलय् छम्हेसिया ज्यान वंगु खः ।
सन् १९९८ ः एटिएससी लुम्बिनीया विमान म्याग्दीइ दुर्घटना जूबलय् झिंच्याम्हेसिया ज्यान वन ।
सन् १९९८ ः एसियन एयरया विमान सोलुखुम्बुइ दुर्घटना जूबलय् स्वम्हेसिया ज्यान वन ।
सन् १९९८ ः नेपाल एयरलाइन्सया विमान सोलुखुम्बुइ हे दुर्घटना जूबलय् छम्हेसिया ज्यान वंगु खः ।
सन् १९९९ ः नेकोन एयरया विमान जुम्लाय् दुर्घटना जूबलय् न्याम्हेसिया ज्यान वन ।
सन् १९९९ ः लुप्थान्सा एयरया विमान येँया भस्मासुर डाँडाय् न्याःवंबलय् न्याम्हेसिया ज्यान वन ।
सन् १९९९ ः नेकोन एयरया विमान येँया रामकोटय् दुर्घटना जूबलय् झिंप्यम्हेसिया ज्यान वन ।
सन् १९९९ ः स्काइलाइनया विमान मकवानपुरय् दुर्घटना जुयाः झिम्हेसिया ज्यान वन ।
सन् २००० ः नेपाल एयरलाइन्सया विमान डडेलुधुराय् जूगु दुर्घटनाय् २५ म्हेसिया ज्यान वन ।
सन् २००१ ः फिस्टेल एयरया विमान राराय् दुर्घटना जूबलय् प्यम्हेसिया ज्यान वन ।
सन् २००२ ः स्काइलाइनया विमान सुर्खेतय् दुर्घटना जूबलय् प्यम्हेसिया ज्यान वन ।
सन् २००२ ः सांग्रीला एयरया विमान कास्कीइ दुर्घटना जूबलय् झिंच्याम्हेसिया ज्यान वन ।
सन् २००४ ः यति एयरलाइन्सया विमान लम्जुङय् दुर्घटना जूबलय् स्वम्हेसिया ज्यान वन ।
सन् २००५ ः एयर डाइनेस्टिकया विमान रामेछापय् दुर्घटना जूबलय् स्वम्हेसिया ज्यान वन ।
सन् २००६ ः यति एयरलाइन्सया विमान जुम्लाय् दुर्घटना जुयाः गुम्हेसिया ज्यान वन ।
सन् २००६ ः यति एयरलाइन्सया हे विमान लुक्लाय् दुर्घटना जूबलय् झिंगुम्हेसिया ज्यान वन ।
२००६ सेप्टेम्बर ः संखुवासभाया घुन्साय् श्री एयरया हेलिकप्टर दुर्घटना जूबलय् २४ म्हेसिया ज्यान वंगु खः । थुकी लानाः तत्कालिन वन तथा भूसंरक्षण राज्यमन्त्री गोपाल राई लिसें संरक्षणविद् डा. हर्क गुरुङ, डा. सीबी गुरुङ, तीर्थमान मास्केपिं मदुगु खः ।
२००८ अक्टोवर ः लुक्ला विमानस्थलय् विमान अवतरण यायेत्यंगु इलय् जूगु दुर्घटनाय् लानाः झिंच्याम्हेसिया ज्यान वंगु खः ।
२०१० अगस्ट ः येँ नं लुक्लापाखे वनाच्वंगु विमान दुर्घटना जुयाः झिंप्यम्हेसिया ज्यान वंगु खः ।
२०१० डिसेम्बर ः लामीडाँडां येँ पाखे वयाच्वंगु विमान ओखलढुंगाय् दुर्घटना जूबलय् झिंगुम्ह यात्रु व स्वम्ह चालकदलया दुजःपिनि ज्यान वंगु खः ।
२०११ सेप्टेम्बर ः माउन्टेट फ्लाइटया निंतिं ब्वःगु बुद्ध एयरया विमान येँया लिक्क कोतडाँडाय् दुर्घटना जूबलय् झिंप्यम्हेसिया ज्यान वंगु खः ।
२०१२ मे ः भारतीय तीर्थयात्रीत ज्वनाः पोखरां जोमसोम वंगु अग्नि एयरया विमान जोमसोम विमानस्थलय् दुर्घटना जूबलय् झिंगुम्हेसिया ज्यान वंगु खः ।
२०१२ सेप्टेम्बर ः येँ नं लुक्लापाखे वंगु सीता एअरया विमान त्रिभुवन विमानस्थल लिक्क दुर्घटना जुयाः झिंगुम्हेसिया ज्यान वंगु खः ।
२०१४ फेब्रुअरी ः पोखरां जुम्लाया निंतिं ब्वःगु नेपाल वायुसेवा निगमया विमान अर्घाखाँचीइ दुर्घटना जूबलय् झिंच्याम्हेसिया ज्यान वंगु खः ।
२०१५ मार्च ः त्रिभुवन अन्तर्राष्ट्रिय विमानस्थलय् टर्किस एअरया विमान धावनमार्गय् हे चुल्लुया छखे लाःवंबलय् प्यन्हु तक विमानस्थल बन्द यायेमाःगु खः ।
२०१५ जुन ः सिन्धुपाल्चोकय् भुखाचय् लाःपिंत राहत व उद्धारया निंतिं वंगु डक्टर्स विदआउट बोर्डसं चार्टर याःगु हेलिकप्टर दुर्घटना जुयाः प्यम्हसिया ज्यान वन ।
२०१५ मे ः भुखाचं लाःपिनि उद्धारया निंतिं वःगु अमेरिकी सेनाया हेलिकप्टर चरिकोट लिक्क दुर्घटना जूबलय् निम्ह अमेरिकी सैनिक, निम्ह नेपाली सैनिक व न्याम्ह सर्वसाधारणया ज्यान वंगु खः ।
२०१६ फेबु्रअरी ः पोखरां जोमसोमया निंतिं ब्वःगु तारा एयरया विमान दुर्घटनाग्रस्त जूबलय् २३ म्हेसिया ज्यान वंगु खः ।
२०१८ मार्च ः बंगलादेशं नेपालय् वंगु यएस बांग्ला एयरलाइन्सया विमान त्रिभुवन विमानस्थलय् दुर्घटना जूबलय् ५१ महेसिया ज्यान वंगु खः ।
२०१८ सेप्टेम्बर ः गोर्खां यो वयाच्वंगु अल्टिच्यूड एयरया हेलिकप्टर धादिंग व नुवाकोटया दथुइ लाःगु जंगलय् दुर्घटना जूबलय् छम्ह जापानी पर्यटक व मेपिं न्याम्हेसिया ज्यान वंगु खः ।
२०१९ फेबु्रअरी ः एयर डाइनेस्टिया हेलिकप्टर ताप्लेजुङया पाथीभरा लिक्क दुर्घटना जूबलय् तत्कालिन संस्कृति, पर्यटन तथा नागरिक उड्डयनमन्त्री रवीन्द्र अधिकारीलिसें न्हय्म्हेसिया ज्यान वंगु खः ।
२०१९ अप्रिल ः सोलुखुम्ब जिल्लाया लुक्ला विमानस्थलय् समित एअरया विमानं धावनमागय् लिक्क दिकातःगु निगः हेलिकप्टरय् ठक्कर नकूबलय् स्वम्हेसिया ज्यान वंगु खः ।
२०२२ मे ः पोखरां जोमसोमया निंतिं ब्वःगु यात्रुवाहक ट्विटअटर दुर्घटना जूबलय् २२ म्हेसिया ज्यान वंगु खः ।
२०२३ जनवरी ः येँ नं पोखरा वनाच्वंगु यति एयरलाइन्सया विमान पोखरा अन्तर्राष्ट्रिय विमानस्थल लिक्क दुर्घटना जूबलय् ६८ म्ह यात्रु व चालकदलया प्यम्ह दुजः यानाः विमानय् दुपिं सकलें मदुगु खः ।