थन राज यायेगु अधिकार झीके दु
येँ- येँ महानगरपालिकाया प्रमुख विद्यासुन्दर शाक्यं महानगर दुनेया सम्पदा पुनःनिर्माण व मर्मत यायेगु ज्याय् मगाःमचाः वा त्वःफिनाच्वंगु दुसा जानकारी बीत इनाप यानादीगु दु । मूर्त अमूर्त सम्पदा व संस्कृतिया संरक्षणय् राज्यया सहभागिता व उपस्थिति दइकथं ज्या याना वयाच्वनागुलिइ मगाःमचाः वा त्वःफिनाच्वंगु दुसा उकियात कयाः जानकारी बीत वय्कलं इनाप यानादीगु खः ।
येँ महानगर प्रमुख शाक्यं उगु खँ नेवाः देय् दबू येँ जिल्लाया स्वक्वःगु अधिवेशनया उलेज्या यासें धयादीगु खः । ‘महानगर दुनेया संरक्षण यायेमाःगु फल्चा, ल्वहंहिति, गुथि छेँ, सतः, दिप आदि छुं नं दयेकेमाःसा सुचं बियादिसँ, जिमिसं दयेकाबी’ महानगर प्रमुख शाक्यं धयादीगु दु ।
येँ जिल्लाया न्हूगु ज्यासना पुचलं म्हिगः स्वयां बांलाक ज्या याना वने फयेमा धकाः भिंतुना बियादिसें वय्कलं धयादिल, ‘येँ देय् झीगु खः, थन झीसं हे राज याये दयेमाः थन राज यायेगु अधिकार झीके दु ।’
येँ देय्या म्हसीका जुयाच्वंगु मरुसतः वंगु कात्तिक मंसिरपाखे हे उलेज्या यायेगु तयारी जुयाच्वंगु खःसां अनावश्यक रुपं विवाद पिकया बिउगुलिं उगु ज्या लिज्याः वंगु नं वय्कलं कनादिल । गोरखानाथया मूर्तियात कयाः मुद्दा तया बिउगुलिं उलेज्या यायेगु ज्या अलमलय् लाः वःगु धासें पुरातत्व विभागं हे स्यंगु मूर्ति तये मते धाःगुलिं उकथं हे थःपिंसं यानागु नं वय्कलं स्पष्ट यानादिल ।
येँ जिल्लाया नायः मचाराजा महर्जनया सभापतित्वय् जूगु अधिवेशनय् विशेष पाहांकथं झायादीम्ह देय् दबूया मूछ्याञ्जे पवित्र वज्राचार्यं वइगु चैत १४ व १५ गते जू वनाच्वंगु दबूया न्हय्क्वःगु तःमुँज्याय् नायः पदय् उम्मेदवारी बीगु घोषणा यानादीगु खः ।
नेपाःया राष्ट्रिय गान, नेवाः राष्ट्रिय म्येँ व देय् दबूया म्येँ हायेकाः न्ह्याःगु ज्याझ्वलय् देय् दबूया सल्लाहकार डा. पंचनारायण महर्जन, मूछ्याञ्जे माइलाबाबु द्यःला, पुलांम्ह राज्यमन्त्री तीर्थराम डंगोल, बागमति प्रदेश नायः उमेश स्थापित, नेवाः मिसा दबूया नायः रश्मिला प्रजापतिं थःथःगु नुगःखँ तयादीगु खः ।
अधिवेशनया निगूगु सत्रं येँ जिल्लाया न्हूगु ज्यासना पुचः नं ल्यःगु खः । न्हूगु ज्यासना पुचलय् धनबहादु तिमिलायात नायः ल्यःगु दु । न्हूगु ज्यासना पुचलय् श्रीजनमान श्रेष्ठ वरिष्ठ न्वकु, रामभोला महर्जन न्वकु, रविना श्रेष्ठ मिसा न्वकु, धनवीर महर्जन छ्याञ्जे, सुनिता महर्जन मिसा छ्याञ्जे व धर्मराज शाक्ययात दांभरिं ल्यःगु दु ।
अथे हे दुजलय् सर्मिला जोशी, जितेन्द्र साय्मि, सुभाष शाही, बालकृष्ण श्रेष्ठ, निर्मला सिंह डंगोल, राजाराम कपाली, सुरेश शिलाकार व सुनिल महर्जनयात ल्यःगु दु । थुकथ हे दुजलय् अमिता महर्जन, लक्ष्मी शाक्य, मायादेवी महर्जन, बलामि, सुशान्त डंगोल, शम्भु मल्ल, श्यामकाजी श्रेष्ठ, कृष्णकुमार नकःमि, मन्दिरा श्रेष्ठ, धर्मेन्द्र महर्जन, सुरेन्द्र शाक्य व कमला महर्जनयात ल्यःगु दुसा राकेश खड्गीयात संगठन विभागया जिम्मेवारी बिउगु दु ।
LEAVE YOUR COMMENTS