येँ मनपां दयेकीगु सार्वजनिक चःबिया ढाँचा तयार
येँ – येँ महानगरपालिकां आवश्यकताकथं थीथी थासय् दयेकेत्यंगु सार्वजनिक चःबिया ढाँचा तयार याःगु दु । येँ मनपां वंगु न्यादँ न्ह्यवंनिसें सार्वजनिक चःबि निर्माण यायेगु तयारी यानाच्वंगु खः । वंगु न्यादँ न्ह्यवंनिसें उकथं तयारी यानाच्वंगुलिइ आः वयाः सार्वजनिक चःबिया ढाँचा तयार जुइवं चालु आर्थिक दँय् निर्माणया ज्या न्ह्याकेगु योजना दुगु येँ मनपां जानकारी बिउगु दु ।
येँ मनपा शहरी योजना आयोगया उपाध्यक्ष सरोज बस्नेतं येँ मनपां थीथी थासय् आवश्यकता स्वयाः दयेकीगु सार्वजनिक चःबिया २० गू कथंया ढाँचा तयार जूगु जानकारी बियादिल । तयार जूगु सार्वजनिक चःबियात आवश्यक थाय् व बजेटया लिधंसाय् चालु आर्थिक दँय् निर्माणया ज्या न्ह्याकेगु नं वय्कलं कनादिल ।
आयोगया उपाध्यक्ष बस्नेतं येँ मनपां तयार याःगु ढाँचा कथंया सार्वजनिक चःबि छक्वःया पालय् छम्हेसिनं जक छ्यले फइगुनिसें अप्वलय् स्वम्हेसिनं तक छ्यले फइगुकथंया चःबि तयार यानागु जानकारी बियादिल । लिसें अज्याःगु चःबिइ शौच यायेगुया नापं म्वःल्हुइ फइकथंया नं चःबिया ढाँचा तयार यानागु वय्कलं कनादिल ।
वय्कःयाकथं थुकथं दयेकूगु डिजाइन म्होतिं नं १५ गू लाख निसें छगू करोडतका लगातय् निर्माण जुइगु व दक्वं चःबिइ सकसिगुं पहँुचयुक्त जुइ । सार्वजनिक चःबिया अवस्था सुधार यायेगु व न्हूगु निर्माण यायेगु ज्यायात नं उतिकं महत्व बियाः महानगरं ज्या यानाच्वंगु धासें वय्कलं धयादिल, ‘सार्वजनिक चःबिया समस्या समाधान जुल धाःसा येँय् वयेवने याइपिं यात्रुतय् मुख्य समस्या नं समाधान जुइ ।’
स्वनिगःन्यंकं ११५ गू सार्वजनिक चःबि दुसा उकीमध्ये महानगर दुने ५८ गू दु । महानगर दुने दुगु चःबिमध्ये नं २८ गू जक छ्यलाबुलाय् वयाच्वंगु दु । मेगु चःबि लःया अभाव व फोहर जूगुलिं प्रयोगविहीन अवस्थाय् लानाच्वंगु मनपां न्ह्यथंगु दु । छ्यलाबुलाय् वयाच्वंगु मध्ये नं गुलिखे चःबिइ बांलाक सुचुकुचु मजूगु, लः व साब्वंया अभाव, मिसामैत्री व अपांगमैत्री मजूगुलिं प्रयोग यायेत अनुकूल जुइ फयाच्वंगु मदु ।
LEAVE YOUR COMMENTS