आः राष्ट्रपतियात हे तप्यंक प्रहार

येँ- जेठ ७ गते चान्हय् संसद भंग यानाः चुनावय् वनेगु धकाः जूगु घोषणाया विरुद्ध देय्या फुक्कं राजनीतिक दल, कानूनविद् व नागरिक समाज थुगुसी राष्ट्रपति विद्यादेवी भण्डारी विरुद्ध हे कुहां वःगु दु । राजनीतिक पार्टीतय्सं थुगुसी वालुवाटारया पलेसा शितल निवास न्ह्यःने प्रदर्शन याना हःगु दुसा आः राष्ट्रपति विरुद्ध महाभियोग तयेमाःगु माग समेत यानाहःगु दु ।

राष्ट्रपति भण्डारीं वंगु जेठ ५ गते तसकं म्हो जक ई बियाः संविधानया धारा ७६ (५) कथं सरकार गठन यायेत आह्वान यानादीगु इलय् हे थ्व ज्या अवैध खः धासें वय्कःया विरुद्ध महाभियोग तयेमाःगु खँ पिहां वःगु खः । वयां लिपा जेठ ७ गते चान्हय् संसद भंग यानाः कार्तिक व मंसिरय् चुनाव यायेगु धकाः मिति घोषणा यायेवं सकलें राजनीतिक पार्टीत तप्यंक हे वय्कः विरुद्ध कुहां वःगु खः ।

राजनीतिक दलतय्सं राष्ट्रपतियात कयाः यानाहःगु छुं प्रमुख न्ह्यसःत थुकथं दु – वय्कलं संसद भंगया निर्णय चान्हय् १.३० बजे यायेमाःगु छाय् आवश्यक जुल ? राष्ट्रपतिया कार्यालय सामान्यतया सनिलया ५ बजे बन्द जुइ, वकुन्हु चान्हय् तक छाय् चायेकातल ? प्रधानमन्त्रीया सिफारिस राष्ट्रपतिं माने यायेमाःगु आवश्यकता दु खः, तर अज्याःगु सिफारिस चान्हय् हे स्वीकृत यायेमाःगु आवश्यक दु ला ? सरकारय् दावी याः वःपिं विपक्षी दलया नेतातय्त वय्कलं थम्हं कानून नं स्वये धयादीगु खः, वय्कलं छु कानून स्वयादिल व सु सु कानूनविद्लिसे सल्लाह यानादिल ? केपी ओली व शेरबहादुर देउवां पेश यानादीगु दावी प्रयाप्त मखुगु जूसा उकियात खारेज याये न्ह्यः निम्हेसितं सःताः वय्कलं छाय् परामर्श यानामदिल ? यदि निम्हेसियां दावी विवादास्पद खःसा वय्कलं सांसदतय्त सःताः छ्यंग्वः ल्याः खायेगु ज्या याये फुगु खः, छाय् अथे यानामदिल ? थ्व स्वयां न्ह्यः वय्कलं यानादीगु संसद विघटन असंवैधानिक खः धकाः सर्वोच्च अदालतं फैसला याना तये हे धुंकूगु दु, हानं उकथं हे संसद विघटनाया सिफारिस वसेंलि वय्कलं उकियात स्वीकृत याये न्ह्यः वहे सर्वोच्चयाके परामर्श यायेमाःगु मखु ला ?

थज्याःगु अनेक न्ह्यसः तसें थुगुसी विपक्षी दलतय्सं वय्कःयात तप्यंक प्रहार यानाहःगु खनेदु । विपक्षीतय्गु ‘मुड’ स्वयेबलय् आःया पालय् छुं जुयाः हानं संसद पुनस्र्थापना जुयाः विपक्षीतय्सं सरकार गठन याये फइगु अवस्था वल धाःसा उमिसं राष्ट्रपति विरुद्ध छुं कानुनी पलाः ल्ह्वनीगु सम्भावना यक्व दु ।

 

प्रधानमन्त्रीपाखें राष्ट्रपतिया बचाउ

विपक्षी राजनीतिक दल व नागरिक समाजं थुपालय् राष्ट्रपति विद्यादेवी भण्डारीयात हे सार्वजनिक रुपं प्रहार शुरु याना हसेंलि प्रधानमन्त्री केपी ओलीं उकिया बचाउ यानादीगु दु । म्हिगः वालुवाटारय् जूगु छगू ज्याझ्वलय् न्ववासें प्रम ओलीं राष्ट्रपतिं याःगु छुं नं ज्यायात कयाः गनं नं उजुरी लगे मजुइगु खँ कनादिल । सिफारिस थम्हं यानागु जूगुलिं थः विरुद्ध अविश्वासया प्रस्ताव हयेत हाथ्या बिसें वय्कलं राष्ट्रपति विरुद्ध आक्रमण यानाया अर्थ मदुगु बिचाः तयादिल । संविधानय् राष्ट्रपतिया ज्या व अधिकार स्पष्ट यानातःगु खँ न्ह्यथँसें वय्कलं राष्ट्रपतिया संवैधानिक अधिकारयात स्वीकार मयाइपिंसं थज्याःगु द्वपं बियाच्वंगु खँ कनादिल ।

सम्बन्धित बुखँ

LEAVE YOUR COMMENTS