विश्वयात न्हापा स्वयां अप्वः शान्ति आवश्यक ः प्रम ओली
येँ(नेपालभाषा टाइम्स)- प्रधानमन्त्री केपी शर्मा ओलीं वर्तमान सन्दर्भय् विश्व जगतयात न्हापा स्वयां अप्वः शान्ति आवश्यक जूगु खँ धयादीगु दु । प्रम ओलीं विश्वय् थौंकन्हय् शान्ति, करुणा, मानवता, स्नेह, ममता, परोपकारया भावना म्हो जुया वनाच्वंगु धासें विश्वया निंतिं थ्व सकतां अति आवश्यक जूगु नं धयादीगु दु ।
प्रम ओलीं वंगु शनिवाः थनया सीघःस्थित धर्मकीर्ति विहारय् जूगु छगू ज्याझ्वःयात संबोधन यानादिसें उगु खँ धयादीगु खः । विहारय् वंगु दछि न्ह्यःनिसें न्ह्यानाच्वंगु ‘गृहस्थ जीवनसम्बन्धी प्रशिक्षण’या समापनया अवसरय् सहभागिपिंत दसिपौ लःल्हानादिसें उगु खँ धयादीगु खः । लिसें वय्कलं बौद्ध शिक्षा थौंया इलय् अझ सामयिक जूगु नं धयादीगु दु ।
‘दम्भया मार्ग त्वःताः मानवीयता व आत्मीयतायात नाला वने फत धाःसा जक विश्वय् शान्ति कायम जुइ नापं पृथ्वीया नं रक्षा याये फइ’, प्रम ओलीं धयादीगु दु, ‘थौं विश्वय् गुगु उन्माद व स्वार्थप्रेरित व्यवहार ब्वलनाच्वंगु दु, उकीं हे विश्वन्यंकं अशान्ति नं न्यना वनाच्वंगु खः ।’
विहारया प्रमुख श्रद्धेय भिक्षुणी धम्मावति गुरुमां नं प्रधानमन्त्री ओलीया आयु आरोग्यया कामना यासें वय्कःया नेतृत्वया वर्तमान सरकारं देय्यात समृद्धिया लँपुइ न्ह्यःने यंकूगु विश्वास प्वंकाबिज्याःगु खः । लिसें प्रम ओलीं धम्मावति गुरुमांया स्वास्थ्य अवस्थाया बारे नं जानकारी कयादीगु खःसा विहारया निरीक्षण नं यानादीगु खः ।
विहारपाखें गृहस्थ जीवन बांलाक न्ह्याकेया निंतिं झीसं छु छु यायेमाः धइगु विषयय् बुद्ध शिक्षालिसे सम्बन्धित ‘गृही विनय’ विषयय् उगु प्रशिक्षण न्ह्याकूगु खः । उगु प्रशिक्षण अन्तर्गत शनिवाः जूगु परीक्षाय् उत्कृष्ट ख्वीप्यम्ह प्रशिक्षार्थीपिंत दसिपौलिसें सिरपाः लःल्हाःगु खः ।
उगु इलय् प्रम ओलीलिसें वय्कःया जहान राधिका शाक्य व येँ महानगरपालिकाया उपप्रमुख सुनिता डंगोलया नं उपस्थिति दुगु खः ।
LEAVE YOUR COMMENTS