‘नेपाः पासा पुचः अमेरिकाय्’या न्हूदँ व दँमुँज्या
मेरिल्याण्ड-अमेरिका (नेपालभाषा टाइम्स)÷नेपालं पिने विदेशय् च्वंपिं नेवाःतय्सं नीस्वंगु न्हापांगु नेवाः संस्था नेपाः पासा पुचः अमेरिकाय् (एनपीपीए) या ३३ क्वःगु दँमुँज्या व ने.सं. ११४५ न्हूदँया ज्याझ्वः हनेज्या जुल । मेरिल्याण्डया गेथर्सवर्गस्थित श्याडी ग्रोभ मिडल स्कुलया हलय् उगु ज्याझ्वः जूगु खः । नेपाल संवत्या प्रवर्तक शंखधर साख्वाःया मूर्तियात खतय् तयाः धिमे बाजं व लाखे प्याखं सहित चाःहीकुसें ज्याझ्वः न्ह्याकूगु खः ।
एनपीपीएया नायः मनोहर श्रेष्ठया सभापतित्वय् तःजिक जूगु उगु ज्याझ्वःया उलेज्या मूपाहां नेपाली मूलया अमेरिकी जनप्रतिनिधि डा. ह्यारी भण्डारी व मू वक्ता मिसेस टुरिजम् युएसए युनिभर्स २०२४ मय्जु राजश्री श्रेष्ठं मंकाः कथं यानादीगु खः ।
ज्याझ्वलय् थःगु बिचाः प्वंकुसें मूपाहां डा. ह्यारी भण्डारीं अमेरिकाय् च्वंपिं नेपाःमितय्सं आः थःपिं गन च्वंच्वनागु खः उगु लागाया कार्यकारी सरकारी निकायय् नं सक्रिय जुइगु भूमिका म्हितेमाः धयादिल । मू वक्ता मय्जु राजश्री श्रेष्ठं ल्याय्म्ह पुस्तायात थःगु लक्ष्यय् केन्द्रित जुयाः न्ह्याः वनेत इनाप यानादिल । एनपीपीएया नायः मनोहर श्रेष्ठं नेपाल संवत्या महिमाबारे चर्चा यासें नेवाः कला, संस्कृति व भाषायात म्वाका तयेगु ज्याय् एनपीपीएं यानाच्वंगु ज्याखँबारे कनादिल ।
ज्याझ्वलय् नांजाःम्ह गायिका मय्जु संगीता शाक्य लिसें थीथी गायक गायिकापिंसं म्ये न्यंकादीगु खःसा थीथी कलाकारतय्सं नेवाः व खय् भाय्या म्येय् हुलाप्याखं प्रस्तुत यानादीगु खः । लिसें एनपीपीएया दँपौ ‘दबू’ या न्हूगु ल्याः नं अन विमोचन जूगु खः । एनपीपीएपाखें थुगु दँया आउटस्टेन्डिङ भोलिन्टियर अवार्ड भाजु जयम्बु रंजितयात लःल्हाःगु खः ।
एनपीपीएलिसे सम्बन्धित थीथी पदाधिकारी व पाहांपिं समेत यानाः अथे हे ३५० म्ह सहभागीतय्सं ब्वति काःगु उगु ज्याझ्वलय् समय्बजि व बहनी नेवाः झ्वःभ्वय् याःगु खः । ज्याझ्वलय् अमेरिकाय् च्वनाच्वंपिं थीथी विशिष्ट व्यक्तित्वपिं लिसें थीथी संघ संस्थाया पदाधिकारीपिनिगु नं उपस्थिति दुगु खः । ज्याझ्वलय् प्रथम न्वकु मय्जु शान्ति श्रेष्ठं उपस्थित सकलें लिसें ग्वाहालि यानादीपिं सकसितं सुभाय् देछासें समापन यानादीगु खः ।
LEAVE YOUR COMMENTS