प्रदूषण जांच विनाया सवारी साधन

देय्न्यंकं चले जुइगु सवारी साधनमध्ये तसकं म्होया ल्याखय् जक प्रदूषणया जांच जुइगु यानाच्वंगु दु । छखे देय्या छगू जक ‘भेहिकल फिटनेस सेन्टर’ (सवारी जांच केन्द्र)य् सीमित सवारी साधनया जक जांच जुयाच्वंगु दुसा मेखे यातायात व्यवस्था ज्याकुथिं सामान्य जांच तकं मयासे सवारी साधनयात नवीकरण यानाच्वंगु दु ।

टेकुस्थित सेन्टर नेपाःया छगूयां छगू जक उपकरणपाखें सवारी जांचपास जुइगु ज्याकू खः । केन्द्रय् चिग्वःगु सवारीया सवारी जांचपास, प्रदूषण परीक्षण व रात्री बसया स्तर कायम यायेगु यानाच्वंगु दु । सार्वजनिक सवारी साधन बाहेक निजी, सरकारी संस्था, कूटनीतिक नियोगया सवारी साधनं नं प्रदूषण न्यंकेगु ज्या यानाच्वंगु जूसां उकिया छुं नं परीक्षण धाःसा मजूगु केन्द्रया वरिष्ठ इन्जिनियर रामचन्द्र पौडेलं कनादिल ।

वय्कलं धयादिल, ‘दक्वं कथंया सवारीया परीक्षण मयासे दुर्घटना म्हो यायेत व प्रदूषण म्हो याये फइमखु ।’ट्याक्सी, टेम्पो, माइक्रोबस (चक्रपथय् चले जुइगु माइक्रोबस बाहेक) व ज्याकुथिइ वइगु दक्वं कथंया सवारी साधनया प्रदूषण जांच जुयाच्वंगु केन्द्रं न्ह्यथंगु दु । अथे हे विद्युतीय सवारीया सतक सक्षमता परीक्षण व रात्री बसय् साधारण, डिलक्स, सुपर डिलक्सया स्तर निर्धारण यायेगु व रुट इजाजत सहमति व रुट परिवर्तनय् सहमति बीगु ज्या केन्द्रं याना वयाच्वंगु दु ।

थ्व बाहेकया सार्वजनिक सवारी व गुगुं नं निजी सवारीया जांच मजुइगु पौडेलं कनादिल । वय्कलं धयादिल, ‘दकलय् अप्वः ल्याखय् दुगु निचाः घःचाः दुगु सवारी साधनया जांच यायेगु व्यवस्था मदु ।’ सरकारं २०६६÷०७ या बजेटय् याःगु व्यवस्थाकथं २०६८ सालय् सवारी जांचपासया उपकरण खरिद याःगु खः ।

उकिया झण्डै स्वदँ तक उपकरणं ज्या मयासे थातं तयातल । ताः ईतक नं उपकरणं ज्या मयाःगुलिं आः नं उपकरणय् समस्या वयाच्वंगु दु । वय्कलं धयादिल, ‘प्रदूषणया मात्रा डिस्प्लेय् क्यनेत समस्या जुयाच्वंगु दु ।’केन्द्रं सवारी परीक्षण यायेबलय् न्ह्यःने व लिनेया घःचालय् गुलि भार दयेमाः, सवारीया क्षमताकथं भार कुबीबलय् ब्रेकं ज्या याइ कि याइमखु, प्राविधिक जांच, सस्पेन्सन (घाःचाःया साइड स्लिप), हर्नया अवस्था, हेडलाइट लगायत स्वयेगु यानाच्वनागु पौडेलं कनादिल ।

वय्कःयाकथं केन्द्र छु खः व वं गथे यानाः ज्या याइ धइगु विषयय् स्वयं सरकारया प्रतिनिधितकं जानकार मदु । इमिसं आतक छक्वः नं केन्द्रय् वयाः थुकिया बारे थुइकेगु ज्या मयासे दक्वं परीक्षण उपकरणपाखें हे जुइ धइगु थुइकाच्वंगु वय्कलं धयादिल । यक्वसिके आः नं छगू हे थासं सवारी वनेवं दक्वं कथंया परीक्षण सिधयेकाः मेगु थासं पिहां वइ धइगु भ्रमया दु ।

छुं छुं परीक्षण जक उपकरणपाखें जुइगु व ल्यं दुगु दक्वं परीक्षण स्वयाः हे यायेगु वय्कलं कनादिल । वय्कलं धयादिल, ‘देय्या छगू जक केन्द्रं गुलि हे ज्या याये फइ व गुलि यानाच्वंगु दु धइगु बारे यक्वसिनं थुइकाच्वंगु खनेमदु ।’देय्न्यंकं दुगु यातायात व्यवस्था ज्याकुथिं जांच मयाःगुलिं समस्या वयाच्वंगु पौडेलया धापू दु ।

देय्न्यंकं दुगु दक्वं ज्याकुथिं हे यक्व कथंया जांच यायेफु । प्राविधिक जनशक्तिं उपकरण मदुसां नं थम्हं फुगु जांच यायेमाःगु खँय् वय्कलं बः बियादिल । न्हूगु संविधानकथं यातायात व्यवस्थापनया जिम्मेवारी प्रदेश सरकारया खः । प्रदेश सरकारं पूर्णरुपं जिम्मेवारी मकाःगुलिं संघीय सरकारं हे आः जिम्मेवारी काःगु दु ।

सरकारं बुटवल व हेटौंडाय् नं केन्द्र स्थापनया निंतिं बजेटया व्यवस्था याःगु दु । थुकी केन्द्रय् छखे स्वनिगःन्यंकंया सार्वजनिक सवारी जांच यायेगु क्षमता माक्व मदुगु व मेखे सहरया दथुइ जूगुलिं जामया समस्या जुइगु पौडेलं धयादिल । सवारी जांच याइगु छगू जक केन्द्रं देय्न्यंकंया दक्वं सवारीया जांच याये मफइगु वय्कलं धयादिल ।

केन्द्रय् घौछिया दुने न्यागःनिसें खुगःतक सवारीया जांच याये फइगु वय्कलं धयादिल । थन छन्हुया दुने ३५ निसें ४० गः जक सवारीया जांच जुइ फइ । सहरया दथुइ जूगुलिं ततःग्वःगु सवारी साधन जांच यायेबलय् सवारी जामया समस्या जुइगु यानाच्वंगु दु ।

सम्बन्धित बुखँ

LEAVE YOUR COMMENTS