एमसीसी टेबल जूसां पास जुइ मखु- प्रचण्ड

येँ – नेकपा माओवादी अध्यक्ष पुष्पकमल दाहालं संसदय् एमसीसी टेबल यायेवं पास जुइ धइगु भ्रमय् मच्वनेत थः कार्यकर्तायात इनाप यानादीगु दु । म्हिगः येँय् न्ह्याःगु माओवादीया बागमति प्रदेश कमिटीया निक्वःगु पूर्ण बैठकय् न्ववासें वय्कलं गठबन्धन ल्यंकेत जक एमसीसी टेबल यायेमाःगु खँ धयादीगु खः ।

वय्कलं एमसीसी टेबल जुयां छुं स्यनी मखु, टेबल हे मयात धाःसा गठबन्धन हे क्वःदलीगु व सभामुखया विरुद्ध तकं षडयन्त्र जुइगु खतरा पिहां वःगुलिं जक टेबल यानागु खँ नं स्पष्ट यानादीगु दु ।

थ्वहे झ्वलय् एमसीसीया विरोधय् माओवादी केन्द्रया थीथी जनवर्गीय संगठनं थौं फिब्व ख्यलय् प्रदर्शन याइगु जूगु दु ।

मेखे थौं संसदया बैठकय् एमसीसी सम्झौतायात कयाः सहलह जुइगु जूगु दु । संसद सचिवालयं सरकारं एमसीसीयात कयाः सहलह यायेगु प्रस्ताव सम्भावित कार्यसूची क्वःछिनातःगु दु । संघीय संसदया महासचिव भरतराज गौतमया कथं बैठकय् अर्थमन्त्री जनार्दन शर्मां नेपाल सरकार व एमसीसी दथुइ जूगु सम्झौता बारे सामान्य सहलह यायेगु धइगु कार्यसूची दु ।

थ्वहे झ्वलय् सरकारया नेतृत्व यानाच्वंगु नेपाली कांग्रेसं थौं च्वनीगु प्रतिनिधिसभाया बैठकय् एमसीसीयात कयाः सैद्धान्तिक सहलह जुइगु जूगुलिं उकी ब्वति कायेत ह्वीप जारी याःगु दु । कांग्रेसया सचेतक पुष्पा भुसालया कथं थौं सञ्चार तथा सूचना प्रविधिमन्त्री ज्ञानेन्द्रबहादुर कार्कीं ‘एमसीसीयात कयाः सामान्य सहलह याये’ धइगु प्रस्ताव तइगु व उकियात बहुमतं स्वीकृत यायेमाःगुलिं सकलें उपस्थित जुयाः उही मत जाहेर यायेत ह्वीप जारी याःगु खः।

अथे हे लोकतान्त्रिक समाजवादी पार्टी (लोसपां) एमसीसी सम्झौताया पक्षय् मतदान यायेगु निर्णय याःगु दु । पार्टी केन्द्रीय ज्याकू बबरमहलय् च्वंगु संसदीय दलया बैठकं एमसीसीया पक्षय् मतदान यायेगु निर्णय याःगुखः । लोसपाया प्रतिनिधिसभाय् झिंस्वम्ह सांसद दु । लोसपाया नेतात न्हापांनिसें हे एमसीसी सम्झौताया पक्षय् दुगु खः ।

एमसीसी सम्झौतायात कयाः थौंया संसदय् सहलह जुइगु जुइवं सभामुख अग्निप्रसाद सापकोटां कार्यव्यवस्था परामर्श समितिया बैठक सःतादीगु दु । प्रतिनिधिसभाया बैठक न्हिनय् १ बजे च्वनीगु जूगु दुसा व स्वयां न्ह्यः सभामुख सापकोटां कार्यव्यवस्था परामर्श समितिया बैठक सःतादीगु खः ।