मनपाया भाषा पाठ्यक्रम दयेकेत समिति

येँ – येँ महानगरपालिकां स्थानीय तहलय् ब्वकेगु पाठ्यपुस्तक दयेकेत समिति स्वंगु दु। येँमनपा शिक्षा समितिया अध्यक्ष विद्यासुन्दर शाक्यया अध्यक्षताय् म्हिगः च्वंगु बैठकं थ्व समिति गठन याःगु खः ।

छगू तगिंनिसें च्यागू तगिं तक ऐच्छिक विषयया रुपय् दुगु नेपालभाषाया पाठ्यक्रम दयेकेगु निंतिं मनपाया शिक्षा अधिकारी निर्मला केसीया अध्यक्षताय् छगू समिति स्वंगु दु। उगु समितिइ प्रा.डा. चुन्दा वज्राचार्य, हरिभक्त श्रेष्ठ व सदस्य सचिवय् मोतिराज खनाल च्वनादीगु दु ।

उकथं हे अग्रेजी व नेपाली विषयया निंतिं नीस्वंगु मेगु समितिइ केसी हे अध्यक्ष जूगु दुसा दुजलय् प्रा.डा. वज्राचार्य, मदनराज मानन्धर, माधव घिमिरे, नातीकाजी महर्जन व ज्ञानबहादुर अधिकारीपिं च्वनादीगु दु। सदस्य सचिवय् शिक्षा विभागया अधिकृत तारापति खरेल च्वनादीगु दु ।

उगु समितियात येँ मनपा दुने न्ह्यानाच्वंगु सामुदायिक व संस्थागत विद्यालयया तगिं छगू निसें च्यागू तकया पाठ्यक्रम दयेकेगु जिम्मेवारी बिउगु दु। सफू च्वयेगु ज्या कार्तिकया निगूगु वालंनिसें शुरु यायेगु तयारी यानाच्वंगु दु। शिक्षा विभागया अधिकृत खरेलं शैक्षिक सत्र २०७६ निसें स्थानीय पाठ्यक्रम प्रत्येक विद्यार्थीया ल्हातय् थ्यनीगु खँ कनादीगु दु ।

वइगु शैक्षिक सत्रंनिसें सामुदायिक विद्यालययात निःशुल्क व संस्थागत विद्यालययात शुल्क पुलाः सफू उपलब्ध याकेगु खँ नं खरेलं कनादिल ।

खरेलया कथं पाठ्यक्रम दयेकेत ६० न्हु काइ । शिक्षा समितिं उकियात पास यानाः कार्यपालिकां अनुमोदन यायेधुंकाः पाठ्यपुस्तक च्वयेगु ज्या न्ह्याइ । पाठ्यक्रमय् येँया पेशा–व्यवसाय, धर्म, कला, संस्कृति, भौगोलिक अवस्थिति, वास्तुकला, मूर्तिकला, पर्यटन थेंज्याःगु विषययात दुथ्याकी ।

येँ महानगरपालिकाया ६० व स्वनिगःया ४० प्रतिशत विषयवस्तु कःघानाः पाठ्यपुस्तक दयेकेगु खँ धाःगु दु ।

सम्बन्धित बुखँ

LEAVE YOUR COMMENTS