सछिदँ बुन्हि कुन्हु यलय् बिदा

यल – यल महानगर–पालिकां २०७६ सालयात वाङमय शताब्दीपुरुष सत्यमोहन जोशी जन्मशताब्दी महोत्सवया रुपय् न्यायेकेगु घोषणा याःगु दु । यल मनपां म्हिगः छगू पत्रकार सम्मेलन यासें शताब्दी पुरुष जोशीया जन्म शताब्दी न्यायेकेत मेयर चिरिबाबु महर्जनया संयोजकत्वय् १११ दुजः दुगु समिति नीस्वंगु जानकारी बिउगु खः ।

महोत्सव न्ह्याइगु न्हि वैशाख ३० गते यल महानगरपालिकाय् सार्वजनिक विदा बीगु नं घोषणा याःगु दु । वैशाख ३० गते जोशी १०० दँय् क्यनी । जन्मशताब्दी न्यायेकेगु निंतिं दछियंकं थीथी ज्याझ्वः यायेगु खँ पत्रकार सम्मेलनय् धाःगु दु । दछियंकं न्यायेकीगु महोत्सवया झ्वलय् नेपाल सरकारलिसे समन्वय यानाः जोशीया तस्वीर अंकित २५०० वंगु नोट प्रकाशन यायेगु, द्वःछि व सछि वंगु वहःया पाँय्म्वः पिकायेगु तयारी जुयाच्वंगु दु ।

उकथं हे दछियंकं यायेगु ज्याझ्वःया कार्यतालिका नं सार्वजनिक याःगु दु । महानगरपालिकां स्रष्टा म्वानाच्वंगु इलय् हे अनुभूति जुइ कथं सम्मान यायेगु परिपाटीया विकास यायेगु तातुनाः थुगु महोत्सव यायेत्यनागु खँ धाःगु दु । यल मनपां छुं ला न्ह्यः जक शताब्दी पुरुष जोशीया सम्मान यायेगु कथं वय्कःयात छगः गाडी लिसें छम्ह चालक व सहयोगीया व्यवस्था याःगु खः ।