मेयर शाह गायब, नगर सभाय् मवं

येँ (नेपालभाषा टाइम्स)÷ येँ महानगरपालिकाया मेयर बालेन शाह नगरसभाया बैठक सःताः थः धाःसा गायब जूगु दु । मेयर शाहं न्ह्यब्वःगु नीति तथा कार्यक्रम वंगु असार १० गतेया नगर सभां पारित याये मफयेवं शुक्रवाः असार १४ गते सुथय् ८ बजे नगर सभा सःतूगु खः । तर नगरसभा सःतूम्ह मेयर शाह धाःसा नगर सभा जुइगु थाय् सभागृहय् थ्यंकः तकं मवः । थःम्हं सःतूगु नगर सभाय् हे मेयर मथ्यनेवं नगरसभाया दुजःपिंसं ‘मेयर तंगू सुचं’ पिकाये माःगु टिप्पणी यानाच्वंगु दु ।

मेयर शाहं हःगु नीति तथा कार्यक्रम थौं नं पारित जुइगु मखनेवं मेयर मवःगु खँ धाःगु दु । नगर सभाया सकले धयाथें दुजःपिं वंगु असार १० गतेया बैठकय् तःगु संशोधन प्रस्ताव पारित मजुइकं नीति व कार्यक्रम पारित मयायेगु धयागु मनस्थितिइ दुगु सीवं मेयर बैठकय् हे मवःगु खः । मेयर शाह थःम्हं हयाःगु नीति तथा कार्यक्रम जबर्जस्ती हे पारित यायेगु कुतः यानाच्वंम्ह खः ।

मेयर शाहं महानगरया कार्यपरिषद्य् तकं महसे नीति तथा कार्यक्रम हःगु खः । थुगु नीति तथा कार्यक्रमय् न्हूसतकयात नो भेहिकल जोन यायेगु लिसें थीथी कार्यक्रम तयातःगु खः । तर नगर सभाय् मेयरं कार्यपरिषद्य् तकं सहलह मयासे हःगु नीति कार्यक्रमयात संशोधन मयायेकं पास यायेफइमखु धकाः विरोध याःगु खः । थ्व झ्वलय् असार १० गते वडा अध्यक्षपिं नवीन मानन्धर, ईश्वरमान डंगोल व नवराज पराजुलीं मंकाः कथं संशोधन प्रस्ताव तःगु खः ।

मेयर शाहं असार १० गते संशोधनया खँयात न्ह्यःने महसे लिपा मिले यानाः वनेगु, आःयात थःम्हं हयागु नीति तथा कार्यक्रम पारित यायेगु धकाः धाःगु खः । तर नगरसभा छप्पं धयाथें जुयाः उकिया विरोध यायेवं उबलय् नीति तथा कार्यक्रम पारित हे मयासे बजेट हःगु खः ।

मेयर शाह मवयेवं नगरसभाया निंतिं वःपिं वडाअध्यक्ष सदस्यपिं लिहां वंगु दु । शाह मवयेवं नगरसभाय् वःपिं दुजःपिंसं हाजिर तकं मयासे मेयरया विरोध याःगु खः ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु