अपूर्व विरुद्ध न्यागू जाहेरी

येँ (नेपालभाषा टाइम्स)- कमेडी क्याफे नांगु छगू हास्य व्यंग्य ज्याझ्वलय् नेवाःतय् अपमान याःगु द्वपं लाःम्ह कमेडियन अपूर्व क्षितिज सिंहं म्हिगः प्रहरी समक्ष आत्मसमर्पण याःगु दु ।

नेवाःतय् जाति, भाषा, नसात्वँसा, संस्कृति, संस्कारयात कयाः सिंहं याःगु व्यंग्यया विरुद्ध नेवाः अभियन्तातय्सं कडा विरोध याःगु दु । म्हीग शनिवाः हे नेवाः अभियन्तातय्सं येँय् छगू ¥याली पिकासें जिल्ला प्रहरी कार्यालयय् उजुरी दर्ता याःगु खः (दर्ता नं. ३१५) ।

उगु उजुरीया लिधंसाय् प्रहरीं सिंहयात म्हिगःनिसें मालाच्वंगु खःसा सिंह धाःसा बेपत्ता जुयाच्वंगु खः । म्हिगः व यलया कोपुण्डोलय् च्वनाच्वंगु खँ सी दयेवं प्रहरीं ज्वनेगु कुतः याःगु खःसां व अनं नं बिसिउँ वंगु खः । सिंह गुगु इलय् गन गन वनाच्वन धकाः अभियन्ता रवि शाक्य (टम एण्ड जेरीं) निरन्तर सूचना मुंकाः प्रहरीयात ग्वाहालि यानाच्वंगु खः । लिपा थःगु सुरक्षाय् समेत खतरा जुइगु महसुस जुइवं सिंह थम्हं हे प्रहरी समक्ष आत्मसमर्पण याःगु खँ सीदुगु दु । प्रहरीं सिंहयात थःपिंसं ज्वनागु खँ धाःगु दु ।

सिंह विरुद्ध शनिवाः नेवाः अभियन्तात यादवलाल कायस्थ, शैलेस बरेजु आदि लगायत १०३ म्हेस्यां जिल्ला प्रहरी कार्यालयय् छगू उजुरी दर्ता याःगु खःसा म्हिगः हानं मेगु प्यंगू उजरी दर्ता यानाः न्यागू थ्यंकूगु दु । उकी मध्ये छगू उजुरी नेवाः मिसापिंसं जक तःगु खः । पृथुविन्दु महर्जन लगायतया पुचलं सिंहं नेवाः मिसापिनि अपमान याःगु धासें बिस्कं उजुरी तःगु खः ।

नेवाः अभियन्तातय्सं आः सिंहयात कानून कथं कारवाही यानाः सजाय बीमाःगु माग याःगु दु । थःगु प्रस्तुतियात नेवाः समुदायपाखें कडा विरोध वयेवं सिंहं सामाजिक सञ्जालपाखें क्षमा नं फ्वनेधुंकूगु दु । तर अभियन्तातय्सं वयात कानून कथं सजाय बीमाः धकाः माग याःगु दु । थुकिया लागिं कानून व्यवसायीतय्सं अध्ययन नं शुरु यायेधुंकूगु खँ सीदुगु दु ।

थ्वहे झ्वलय् नेवाः देय् दबूपाखें अध्यक्ष पवित्र वज्राचार्यं म्हिगः छगू विज्ञप्ति जारी यासें कमेडियन सिंहं क्षमा फ्वनेमाःगु व वयागु कार्यक्रमयात युट्यूबं चीकेत माग याःगु दु ।

अथे हे नेत्र विक्रम चन्द विप्लव समर्थित माओवादीया नेवाः मुक्ति मोर्चा येँ जिल्लाया नायः दिपक मानन्धरं सिंहयात क्षमा बीगु मखुसें कानुनी कारवाही हे यायेमाः, मखुसा वयात थःपिंसं हे जनकारवाही यायेमाली धकाः ख्याच्वः बियादीगु दु ।

थ्वहे झ्वलय् सामाजिक सञ्जालय् सिंहया कडा आलोचना शुरु जूगु दु । च्वमिपिं प्रकाश साय्मि, अभिषेक जोशीपिंसं सिंहया प्रस्तुति छुं हे कथं कलाकारिता मजूगु धासें थुकिं नेवाः थेंज्याःगु सम्पन्न व सभ्य समाजया तःधंगु अपमान याःगु खँ धाःगु दु ।