खोपयात कयाः इयु व एस्ट्राजेनिका दथुइ विवाद

एजेन्सी – कोरोना भाइरसविरुद्ध खोप विकास याःगु बेलायती कम्पनी एस्ट्राजेनिकां थःपिसं बचं बियातयाकथं खोप आपुर्ति यायेगु ज्या लिबाइगु खँ धायेवं युरोपेली सङ्घ ईयूया नेतात तम्वःगु दु। एस्ट्राजेनिकां युरोपय् च्वंगु थःपिनिगु निगू उत्पादन केन्द्रय् समस्या वःगुलिं थःपिंसं धयातयागु इलय् खोप बीमफइगु खँ धाःगु खः । संघं धाःसा कम्पनीं न्हापा बचं बियातःकथं मेमेथाय् उत्पादन हयाः जूसा पूवंक खोप आपूर्ति यायेमाः धाःगु दु ।

खोप हयेगु ज्या लिबानाच्वंगुलिं अथें नं संघया आलोचना जुयाच्वंगु इलय् झन् पूवंक खोप बीफइमखु धाःगुलिं संघया नेतात आक्रोसित जूगु खः । एस्ट्राजेनिकां सन् २०२१या जनवरी-मार्चया नितिं सम्झौता षाःगु स्वयां ६० प्रतिसत म्हो जक खोप उपलब्ध यायेफइ धाःगु खः। द नेदरल्याण्ड्स व बेल्जियमया उत्पादन केन्द्रय् समस्या वःगुलिं थःपिसं धयागु स्वयां निला लिपा जक पूवंक खोप बीफइगु धापु कम्पनीया दु । समस्या समाधानया नीति निगू पक्षया दथुइ वार्ता जूसां संघं धाःसा थःपिंत क्वछिनातःगु इलय् हे खोप थ्यंकेमाः धका अडान काःगु दु ।

इयुया स्वास्थ्य आयुक्त स्टेला किरियाकिअसं छगू एउटा ट्विट यासें ‘आपूर्तीया समयसीमाया बारे स्पष्टताया अभाव’ जुयाच्वंगुप्रति थःपिनि खेद दु धयादीगु दु । बुधवारया छगू पत्रकार सम्मेलनय् किरियाकिअसं समस्या मदुगु बेलायतया उत्पादन केन्द्रत नं सम्झौताया दुथ्यागुलिं अनया उत्पादनंसां आपुर्ती याये हे माः धयादीगु दु । वय्कलं धयादीगु दु, ‘ईयूया सकलें २७ गू देय् एस्ट्राजेनिकां जिपिं लिसे याःगु बचंकथं आपूर्ती याये हे माः धयागु खँय् एकताबद्ध दु ।’

ईयुं वंगु अगस्टय् एस्ट्राजेनिकालिसे ३० करोड मात्रा खोपया नितिं छगू सम्झौता याःगु खः । गुकि सम्भव दुसा थप १० करोड डोज उपलब्ध याकेगु खँ तकं न्ह्यथनातःगु दु। इटलीं ढिलासुस्तीयात कयाः कानुनी उपचारय् वनेगु ख्याच्वः बीधुंकूगु दु। ईयुलिसे अझ तःधंगु खोपया सम्झौता यानातःगु कम्पनी फाइजर/बायोएनटेकं नं ढिलासुस्ती यानाच्वंगु दु ।

थ्व हे दथुइ फ्रान्सेली वासः उत्पादक कम्पनी सानोफीं थ्व दँया अन्त्यतक फाइजर/बायोएनटेकयात १२.५ करोड मात्रा खोप उत्पादनय् ग्वाहालि यायेगु घोषणा याःगु दु । सानोफीया वक्तव्यय् जर्मनीया वायोएनटेकयात जुलाईनिसें फ्य्राङ्फर्टय् च्वंगु थःगु उत्पादन केन्द्र छ्यलेबीगु खँ धाःगु खः ।