स्वास्थ्यमन्त्री बर्खास्त यायेत एमालेया माग

येँ – प्रमुख प्रतिपक्षी दल नेकपा एमालें स्वास्थ्य मन्त्री विरोध खतिवडायात मन्त्री पदं बर्खास्त यायेत माग याःगु दु । एमालेया स्वास्थ्य तथा जनसंख्या विभागया प्रमुख योगेश भट्टराईं म्हिगः छगू विज्ञप्ति जारी यासें मन्त्री खतिवडां २४ लाख खोप तंगु तथ्य त्वपुइत स्वःगु लिसें खोप न्यानाः खोप बीगु ज्या जूगु धकाः मखुगु अभिव्यक्ति बिउगु धासें बर्खास्त यायेत माग याःगु खः ।

उकथं हे विज्ञप्तिइ स्वास्थ्यमन्त्री खतिवडां वंगु छुं न्हि न्ह्यः जक छगू टेलिभिजनय् खोप मतंगु दावी यासें तत्कालीन प्रधानमन्त्री केपी शर्मा ओली नेतृत्वया सरकारया इलय् थम्हं कोभिड विरुद्धया न्हापांगु खोप न्याद्वः पुलाः कयागु धाःगु खँय् नं एमालेया गम्भीर ध्यानाकर्षण जूगु खँ न्ह्यथनातःगु दु ।

विज्ञप्तिइ धयातःगु दु, ‘खोप न्यानाः कयागु धयागु स्वास्थ्यमन्त्री खतिवडाया धापू सरासर झुठ, अफवाहपूर्ण दु, सिभिल अस्पताल, बानेश्वरय् न्हापांगु मात्राया खोप २०७७ फागुन १९ गते काःगु अभिलेख सुरक्षित दु, सांसदपिनिगु निंतिं सरकारं निगूगु डोज संसद भवन बानेश्वरय् व स्वंगूगु डोज सीसीएमसी कार्यालय परिसरय् व्यवस्था याःगु फुकस्यां सिउगु हे खँ खः, उगु तथ्यं स्पष्ट जुइ, स्वास्थ्य मन्त्री खतिवडां पुलांगु सरकारयात बदनाम यायेत हे कोभिड थेंज्याःगु संवेदनशील विषयय् अफवाह ब्वलंकेगु ज्या याःगु दु ।’

थ्वहे झ्वलय् कोरोना खोप अभियानया झ्वलय् गम्भीर लापरवाही जूगु लूगु दु । स्वास्थ्य तथा जनसंख्या मन्त्रालयं नीस्वंगु छानविन समितिं उगु कमजोरी लुइकूगु खः । छानविन समितिं तयार याःगु प्रतिवेदन कथं ध्यबा कयाः खोप बिउगु, खोपया उचित भण्डारण मयाःगुलिं अप्वः खोप छ्यले मजिउगु खँ न्ह्यथनातःगु दु ।

उकथं हे समितिं खोप अभियान न्ह्याकेगु झ्वलय् लापरबाही याःगु निकाय बारे सत्य तथ्य छानविन यानाः कारबाही यायेगु नितिं अधिकार सम्पन्न समिति नीस्वनेत सुझाव नं बिउगु दु । कोरोना भाइरस विरुद्धया २४ लाख खोप तंगु खँ सार्वजनिक जुइधुंकाः स्वास्थ्य तथा जनसंख्या मन्त्री विरोध खतिवडां न्याम्ह दुजः दुगु छानविन समिति नीस्वंगु खः ।

सम्बन्धित बुखँ

LEAVE YOUR COMMENTS