सतक विस्तार पीडिततय्त ज्वन
वडा नं. ४ या वडाध्यक्ष विरुद्ध पीडित जनताया प्रदर्शन
येँ – स्थानीय जनताया निजी छेँ थुनेगु ज्याया विरोध याःपिंत प्रहरीं ज्वंगु दु । येँया धुम्बाराहीनिवासी श्याम पियाया छेँ थुनेगु कुतः याःगु विरोधय् येँ मनपा ४ नम्बर वडाय् निवेदन तः वंपिं सतक विस्तार पीडित संघर्ष समितिया दुजःपिंत ज्वना यंकूगु खः ।वडाध्यक्ष मोहन बिष्टं सहलह जुयाच्वंगु इलय् पीडित श्याम पियायात गःतां ज्वनेवं अन विवाद ब्वलंगु खः ।
विवाद लिपा वडाध्यक्ष बिष्टं प्रहरी सःताः सघर्ष समितिया दुजःपिं ज्वंकूगु खः । बिष्टं थःपिंत हातपात याःगु द्वपं बिसें संघर्ष समितिया अध्यक्ष सुमन साय्मि, उपाध्यक्ष महेश कारंजित व पीडित पियायात ज्वंकूगु खः ।अध्यक्ष साय्मिं कनादीकथं वय्कःपिंसं ८ फिट लँ कायम जुइमाः धकाः निवेदन तः वंगु खःसा वडाध्यक्ष बिष्टं निवेदन दर्ता तकं मयाःगु खः ।
वडाध्यक्ष तकं पीडित जनताया विपक्षय् दुगु खँ वय्कलं कनादिल । पीडित पियां ‘नेपालभाषा टाइम्स’ लिसे खँ ल्हासें न्हापा उगु लँ ८ फिट जक दुगु खःसा आः उकियात बढे यानाः १३ फिट याःगुलिं थःगु छेँ तकं थुनेगु नियतं संधियार व वडा सदस्य ध्रुव त्रिपाठीं जबरजस्ती लँ तब्या यायेगु कुतः यानाच्वंगु द्वपं बियादिल संधियारं थःगु जग्गाया भाः अप्वयेकेत थुकथं ८ फिट लँयात १३ फिट यायेत्यंगु खँ नं वय्कलं कनादिल ।
अदालतं तकं ८ फिट लँ कायम यायेगु निर्णय यायेधुंकूगु जानकारी बिसें वय्कलं अदालतया भ्वं क्यनं नं वडां १३ फिट लँ हे कायम जुइ धकाः लिसः बिउगु खँ वय्कलं कनादिल । अथेहे अध्यक्ष साय्मिं पियाया छेँ थुनेगु ज्या पूर्ण रुपं नियोजित धासें प्रहरी प्रशासन नं पीडकया पक्षय् दुगु द्वपं बियादिल ।
वय्कलं धयादी, ‘जिमित कमलपोखरी प्रहरीं ज्वंगु दु, जब कि धुम्बाराही लागा धइगु महाराजगञ्जं स्वइगु खः, जिमित थन हयेगु औचित्य मदु ।’ थ्वहे झ्वलय् सतक विस्तार पीडित संघर्ष समितिया दुजःपिंत ज्वंगु विरोधय् म्हिगः विशाल बजार न्ह्यःने प्रदर्शन याःगु दु ।
प्रदर्शनया झ्वलय् ‘डोजर आतंक बन्द या, जनताया छेँ थुने दइ मखु’ च्वयातःगु प्लेकार्ड नं ब्वया वःगु खः । लिपा प्रदर्शनकारीत कमलपोखरी वनाः अन नं प्रहरी कार्यालय न्ह्यःने धर्ना बिउगु खः ।
LEAVE YOUR COMMENTS