ज्याथा पंचदान गुथिया छेँ दनेत जग स्वन
- नेपालभाषा टाइम्स
- ???? ??????? चतुर्दशी
- किपा-निपेन्द्र लाल श्रेष्ठ
येँ (नेपालभाषा टाइम्स) – येँ महानगरपालिका वडा नं. २५ ज्याथास्थित ज्याथा पंचदान गुथि भवन निर्माणया निंतिं जग स्वनेगु ज्या जूगु दु । येँ महानगरपालिकाया प्रमुख विद्यासुन्दर शाक्यं भवन निर्माणया छगू ज्याझ्वःया दथुइ जग स्वनादीगु खः ।
ज्याथा पंचदान गुथि प्रजापति खलःया नायः धनबहादुर प्रजापतिया सभापतित्वय् जूगु जग स्वनेज्याय् नवासें येँ मनपा प्रमुख शाक्यं महानगरया मूर्त, अमूर्त छुं कथंया नं सांस्कृतिक सम्पदा पुनःनिर्माण, मर्मत सम्भार वा मेगु छुं कथंया नं ज्याये माल धाःसा उकिया निंतिं आर्थिक अभाव मजुइगु व प्रक्रियाय् नं ढिलासुस्ती जुइ मखु धयादिल ।
महानगर दुनेया सांस्कृतिक महत्वया सम्पदा संरक्षण, पुनःनिर्माण, मर्मतया ज्याया निंतिं महानगरया जनप्रतिनिधि दथुइ निगू मत मदुगु स्पष्ट यासें वय्कलं धयादिल, ‘दक्वसिगु मंकाःकथं सहमति व साझा लक्ष्यलिसें योजनात स्वीकृत यायेगु याना वयाच्वनागु दु । अथे खःसां नं गबलें गबलें गुथ्याःत व अंशियारया दथुइ ब्वलनीगु विवाद, कचवं व ल्वापुया कारणं द्यःछेँ, आगंछेँ, फल्चा, सतः आदि संरचना निर्माण यायेगु ज्याय् ढिलासुस्ती जुइगु यानाच्वंगु दु।’ थज्याःगु ज्याय् पंगः थनेगु मखसे सकलें छप्पँ जुयाः निर्माणय् ग्वाहालि यायेत नं वय्कलं इनाप यानादिल ।
येँ मनपा २५ वडाअध्यक्ष नीलकाजी शाक्यं वडावासीया चाहना पूवंकेगु हे महानगरया लक्ष्य खः धयादिल । वय्कलं स्थानीय सम्पदा प्रवद्र्धन जूसा हे जक महानगरं सही पहिचान बीत सफल जुइ धासें प्रचलित व्यवस्थायात आधार कयाः हे स्थानीय विकासया लक्ष्य पूवंकेगु जुइ धयादिल ।
येँ मनपां भवन निर्माणय् लगे जुइगु नक्साया दस्तुर मिनाहा याना बिउगु खः । भवन निर्माणया निंतिं नक्सा वापतया स्वंगू लख झिंन्याद्वः व ८०५ तका दां मिनाहा यायेगु छुं दिं न्ह्यः जक च्वंगु कार्यपालिकाया बैठकं निर्णय याःगु खः । वंगु असोज १८ गते च्वंगु बैठकं निर्माण जुइत्यंगु भवनया नक्सा दस्तुर मिनाहा यायेगु प्रस्तवाय् सहलह यासें दस्तुर मिनाहा यायेगु निर्णय याःगु खः ।
६ आना क्षेत्रफलय् प्यतँत्या जाःया भवन निर्माणया निंतिं करिब प्यंगू करोड तका लागत तुइगु अनुमान याःगु दुसा दछिया दुने भवन निर्माण सिधयेकेगु लक्ष्य कयातःगु दु। भवन निर्माणया निंतिं न्हापांगु चरणय् येँ मनपां ७५ गू लाख तका उपलब्ध याकीगु जूगु दुसा उपभोक्ता श्रमदानपाखें १५ प्रतिशत लगानी याइगु जूगु दु ।
LEAVE YOUR COMMENTS