अवैध लगानीपाखे सरकारया मिखा

छानबिन समिति दयेकाः अवैध ध्यबायात वैध यायेगु तयारी

येँ – नेपालय् लगानी यायेगु धकाः विदेशं दुहां वयाच्वंगु ध्यबाया वास्तविक स्रोत छु खः धकाः नेपाः सरकारं मालेगु ज्या न्ह्याकूगु दु । वैदेशिक लगानीया नामय् आपालं अवैध ध्यबा अवैध तरिकां दुहां वयाच्वंगु खने दयेवं अज्याःगु ध्यबाया स्रोत मालेगु ज्या उद्योग वाणिज्य तथा आपूर्ति मन्त्रालयं छगू बिस्कं समित हे नीस्वनाः न्ह्याकूगु खँ सीदुगु दु ।

नेपालय् दुहां वइगु आपालं वैदेशिक लगानीया स्रोत खुले मजूगुलिं उकियात नियन्त्रण यायेत मन्त्रालय अन्तर्गत औद्योगिक तथा लगानी प्रवद्र्धन बोर्डं थ्व ज्या न्ह्याकूगु खः । बोर्डं मन्त्रालयया प्रवक्ता दिनेश भट्टराईया नेतृत्वय् छानविन समिति नीस्वंगु खः । समितिं उद्योग विभाग व राष्ट्र बैंकयात पत्राचार यासें नियम पूरा यानाः वःगु व नियम हाचां गायाः वःगु लगानीया बारे जानकारी फ्वंगु दु ।

छानविन समितिं विदेशी लगानीयात प्रक्रियाय् वयेत सुचं जारी यायेगु प्रक्रिया नं न्ह्याकूगु दु । सुचं जारी जुइवं स्रोत खुले मजूगु लगानी गुगु मितिइ, गुलि लगानी जूगु खः व उकिया लगानीकर्ताया नां, थर, ठेगाना फुक्कं खुले यानाः निवेदन बीमाःगु खँ समितिं धाःगु दु । थुकिया लिसें समितिं सम्भावित स्रोत खुले मजूगु वैदेशिक लगानीयात कयाः नं अध्ययन याइगु खँ धाःगु दु ।

नेपालय् विदेशी लगानी वयेगु नामय् अवैध ध्यबा दुहां वयाच्वंगु चर्चा ताः ई न्ह्यवंनिसें जुयाच्वंसां नं उकियात नियन्त्रण याये मफयाच्वंगु खःसा आः उकियात नियन्त्रण यायेगु कथं समितिं ज्या न्ह्याकेत्यंगु खः । विदेशं वइगु लगानी व्यवस्थापन यायेगु समस्या जुयाः नेपाःया छबीइ अन्तर्राष्ट्रिय रुपं न्ह्यसःचिं थनेवं सरकारं उकियात कयाः छानवीन यायेगु व व्यवस्थापन यायेत्यंगुु खः ।

मेखे नेपालय् थीथी रुपं दुहां वयाच्वंगु अज्याःगु ध्यबायात वैधानिक यायेत नेपाःया उद्योगपति धाःसा सक्रिय जुयाः लगे जुयाच्वंगु खँ सीदुगु दु । सूत्रं धाः कथं वास्तवय् उद्योगीतय्सं स्रोत खुले मयासे हयाच्वंगु अज्याःगु ध्यबा यात वैध यायेगु निंतिं हे सरकारं थज्याःगु समिति गठन यानाः ज्या न्ह्याकाच्वंगु खः ।

नेपालय् तःधंगु लगानी वयाच्वंसां राष्ट्र बैंकं उकियात पना तःगु खः । तर आः सरकारं हे उकियात वैधानिक दयेकेगु लागिं समिति गठन यानाः छानबिन यायेगु व छानबिनं छुं खने मंत धासें क्लिन् चिट् बीगु तयारी यानाच्वंगु खँ नं सूत्रं धाःगु दु ।

सम्बन्धित बुखँ

LEAVE YOUR COMMENTS