बौद्ध महिला संघया बौद्ध सभा व सिरपाः लःल्हायेगु ज्याझ्वः
येँ- बौद्ध महिला संघ नेपालया ग्वसालय् २५६३ क्वःगु स्वांयाःपुन्हिया लसताय् बौद्ध सभा व सिरपाः लःल्हायेगु ज्याझ्वः जुल । थनया धल्कोय् च्वंगु संघाराम विहारय् संघया अध्यक्ष सुजाता मानन्धरया सभापतित्वय् जूगु सभाय् विश्वशान्ति विहार बौद्ध शिक्षालयया प्रिन्सिपल, थेरवाद एकेदमिया सचिवलिसें लुम्बिनी विकास कोषया पुलांम्ह उपाध्यक्ष भिक्षु निग्रोध महास्थविर मूपाहांकथं बिज्याःगु खः ।
संघाराम विहारया प्रमुख भिक्ष उपतिस्सपाखें पंचशील बियाः न्ह्याःगु ज्याझ्वलय् संघया उपाध्यक्ष वीणा कंसाकारं लसकुस यानादीगु खः । ज्याझ्वलय् संघया उपाध्यक्ष शकुन्तला प्रधानया सक्रियताय् परोपकार आदर्श मा.वि.इ संचालन जुयाच्वंगु परियत्ति शिक्षाय् उत्तीर्ण जुयादीपिं ५९ म्ह विद्यार्थीपिंत मूपाहां भिक्षु निग्रोध महास्थविरं सिरपाः लःल्हाना बिज्याःगु खः ।
ज्याझ्वलय् अखिल नेपाल भिक्षु महासंघया कार्यकारिणी दुजःलिसें नेपाल बौद्ध परियत्ति परिषद्या सचिव भिक्षु पियदस्सी, संघया सल्लाहकार बौद्ध विद्वान प्रा. सुवर्ण शाक्यं नुगःखँ तयादीगु खः ।
उगु हे ज्याझ्वलय् संघया संरक्षक रत्नदेवी तुलाधरं थः दिवंगत जहान कुलवीरसिंह तुलाधरया लुमन्तिइ संघपाखें संचालन जुयाच्वंगु सुमना गुरुमां स्वास्थ्य कोषया निंतिं छगू लख तका व टेवा स्वरुप संघयात छगू लख तका दां लःल्हानादिल ।
थुकथं हे सूवर्णजीव व अन्नपूर्णपाखें १,११,१११÷–, निश्चल व एलिजां ११,१११÷–, विनी तुलाधर, अमरशोभा व प्रीजा तुलाधरं म्हतिं ५,५०५÷– तका व संगीता तुलाधरं द्वःछि तका संघया थेरवाद बौद्ध संग्रहालययात हापं बियादीगु खः ।
LEAVE YOUR COMMENTS