पार्टी जिम्मेवारी बिल धाःसा हाकनं उम्मेदवारी बीगु जुइ – मेयर शाक्य

येँ – येँ महानगरपालिकाया प्रमुख विद्यासुन्दर शाक्यं हाकन नं येँ महानगरया प्रमुखय् उम्मेदवारी बीगु इच्छा प्वंकादीगु दु । येँ महानगर प्रमुख शाक्यं यदि पार्टी जिम्मेवारी बिल धाःसा थः हाकनं नं येँ महानगरया प्रमुखय् उम्मेदवारी बीगु विचाः प्वंकादीगु खः ।

येँ महानगरपालिका वडा नं. २१ य् गोफलय् श्रीधर नारायणया फल्चा प पार्कया शिलान्यास ज्याझ्वलय् नवासें वय्कलं उगु इच्छा प्वंकादीगु खः । ‘पार्टी जिम्मेवारी बिल धाःसा व महानगरवासीया ग्वाहालि दत धाःसा थः हाकनं नं येँ महानगरया प्रमुख जुयाः ज्या यायेगु जुइ’ महानगर प्रमुख शाक्यं धयादिल ।

वय्कलं थःगु दावेदारी कायम दु धासें वर्तमान इलय् आपालं थासय् सांस्कृतिक, धार्मिक महत्वया सम्पदात शिलान्यास यानागु व अज्याःगु सम्पदा निर्माण सिधयेकाः उलेज्या यायेगु जुइ धयादिल ।

आः जुइगु स्थानीय निकायया निर्वाचनय् निक्वःखुसी येँ महानगर प्रमुखय् उम्मेदावरी बीगु इच्छा यानादीम्ह वय्कलं उम्मेदवारी बीगु हे धकाः घोषणा धाःसा यानामदी । ‘जि छम्ह पार्टीया कार्यकर्ता खः । पार्टी आवश्यकता स्वयाः गुगु जिम्मेवारी बीगु व स्वये मानि, थुकी पार्टीं हे निर्णय याइ’, येँ महानगर प्रमुख शाक्यं धयादिल, ‘महानगरवासीया चाहना छु दु व नं स्वयेमाःगु दु । उकियात थुइकाः पार्टी जिम्मा बिउसा यायेगु खः, मखु पार्टीं मेपिं हे सुयातं जिम्मा बिल धाःसां नं महानगरपालिकाय् थःपिंसं हे त्याकेगुकथंया तयारी अवस्थाय् नं जिपिं वनाच्वनागु दु ।’

वर्तमान थःगु कार्यकालय् आपालं सम्पदा, सांस्कृतिक धरोहरया शिलान्यास यानागु जानकारी बियादिसें वय्कलं धयादिल, ‘शिलान्यास जू थें आः उद्घाटन गबले जुइ धइगु जिज्ञासा वयाच्वंगु दु । निश्चित इलय् निर्माण सिधयेकाः उद्घाटन नं जुइ ।’

येँ महानगरपालिका छगू ऐतिहासिक व सांस्कृतिक सहर जूगु धासें महानगर दुनेया ऐतिहासिक, धार्मिक, सांस्कृतिक, पुरातात्विक सम्पदाया संरक्षण, संवद्र्धन यानाः पर्यटनलिसे स्वाना यंकेगु ज्या महानगरया जूगु वय्कलं धयादिल ।

‘महानगरय् न्ह्याथाय् स्वःसां देगःया देगः जक दु । थन आपालं फल्चा, सतः, ल्वहंहिति नं दु । थुपिं सम्पदात न्ह्याम्हेसिनं दयेकूगु खःसां झी पुर्खां दयेका थकूगु खः । अबलय् न्ह्याम्हेसिनं दयेकूगु जूसां झी पुर्खां दयेकूगु थज्याःगु सम्पदाया संरक्षण व प्रर्वद्धनलिसें थुकियात पर्यटनलिसे स्वायेगु महानगरया नीति हे जूगुलिं वइगु दिनय् नं सांस्कृतिक सम्पदा संरक्षण, संवद्र्धन याना वनेगु महानरया नीतिं हे जुइगु वय्कलं स्पष्ट यानादिल ।

थःपिंसं न्हापा धया वयाच्वना थें पुनःनिर्माणयात निरन्तरता नं बिया वयाच्वनागु दु धासें वय्कलं विकास निर्माणया ज्या गबलें नं सिमधइगु जूगुलिं येँया विकासया निंतिं महानगर न्ह्याबलें नं न्ह्यचिला च्वनी धकाः प्रतिवद्धता नं प्वंकादिल ।