क्युबाय् निदँ दुपिं मस्तय्त कोरोनाया खोप

एजेन्सी- क्युबाय् निदँ दुपिं मस्तय्त कोरोनाविरुद्धया खोप बिउगु दु । क्युबाया सरकारी सञ्चार माध्यमयाकथं मस्तय्त स्कुलय् छ्वयेत खोप बिइगु शुरु याःगु खः । मस्तय्त खोप बिउगु क्युबा न्हापांगु देय् खः । क्युबां थःपिंसं हे दयेकूगु खोप मस्तय्त बियाच्वंगु दु । संसारया मेगु छुं नं देशं मस्तय्त कोरोनाया खोप बिउगु मदुनि । क्युबां थःपिनिगु खोप सुरक्षित जूगु व विश्व स्वास्थ्य संगठनया स्वीकृति कायेगु कुतः यानाच्वनागु नं धाःगु दु । क्यूबाया सरकारं गुलि मस्ततय्त खोप बिइधुन धकाः धाःसा धाःगु मदुनि ।

क्युबाया स्वास्थ्य मन्त्रालययाकथं आःतक ४० लाख मनूतय्सं कोरोना खोपया पूरा डोज कायेधुंकूगु धाःगु दु । क्युबाया सरकारं स्वास्थ्यकर्मी, जेष्ठ नागरिक व अति प्रभावित थासय् च्वपिं मनूतय्त न्हापां खोप बिइगु धाःगु खःसा मस्तय्त नं कोरोना संक्रमण अप्वःगुलिं व मस्तय्त बचे यायेत मस्तय्त प्राथमिकता बियागु धाःगु दु ।

सम्बन्धित बुखँ

LEAVE YOUR COMMENTS