ने. सं. ११४६ बछलागा दशमी -

आः पत्रकारतय्त नं हाकुगु धलखय् तइगु

येँ – बैंकिंग सेवाय् गलत ज्या याइपिंत हाकुगु धलखय् (ब्ल्याक लिस्ट) य् तइ थें आः पत्रकारिता पेशाय् पटक पटक गल्ती याइपिंत नं हाकुगु धलखय् तइगु जूगु दु ।पत्रकारतय् हकय् थ्व नियम उमिसं सञ्चालन याइगु सञ्चार माध्यमय् जक मखु सामाजिक सञ्जालय् तकं लागू जुइ । आः सामाजिक सन्जालय् लाथेपाथे च्वइपिं, कमेन्ट याइपिं व लाइक याइपिं सञ्चारकर्मीतय्त समेत आचारसंहिता उल्लंघन अन्तर्गत कार्वाहीया दायराय् हइगु जूगु दु ।

पत्रकारिता पेशायात मर्यादित, जिम्मेवार व थप उत्तरदायी यायेत प्रेस काउन्सिल नेपाल, पत्रकार महासंघ व सरोकारवाला मनूतय्गु भेलां म्हिगः अन्तिम रुप बिउगु पत्रकार आचार संहिताय् थ्व खँ उल्लेख दु। थ्वहे वइगु असोज ६ गतेनिसें थ्व न्हूगु आचार संहिता जारी जुइ । थुकी सूचीकृत मजूगु, अपुष्ट, अतिरञ्जित, भ्रामक सामग्री सम्प्रेषण याइगु विद्युतीय सन्चार माध्यमतय्गु प्रशारण निश्चित अवधि तक पने फइगु व्यवस्था तकं दु।