ने. सं. ११४४ कौलाथ्व पारू - नःलास्वनेगु

लकस नेपालया झिंस्वक्वःगु स्थापना दिवस

यल(नेपालभाषा टाइम्स)- लकस नेपाल नांया संस्थां थःगु झिंस्क्क्वःगु स्थापना दिवस हनेगु झ्वलय् थीथी व्यक्ति व संघसंस्थायात हनेज्या याःगु दु । संस्थां थःगु स्थापना दिवसया लसताय् गोदावरी नगरपालिका वडा नं. ६ लामिडाँडाया गणेशबहादुर नगरकोटीयात ‘लकस नेपाल वर्ष व्यक्तित्व सम्मान – २०८०’ लःल्हाःगु खः ।

संस्थाया सहजीकरणय् १४ हजार लिटरया लः शुद्धिकरण ट्यांकी निर्माण व व्यवस्थापनय् निरन्तर रुपं क्रियाशील जुयाच्वंगु धासें नगरकोटीयात उगु सम्मान लःल्हाःगु खः । पेशां मजदुरी याना वयाच्वंम्ह नगरकोटीं समुदायया नेतृत्व यानाः ८५ छेँखाया छेँजःपिंत त्वनेगु लः छेँ छेँय् थ्यंकेगु ज्या यानाच्वंगु धासें हनेज्या याःगु खः ।

ज्याझ्वलय् पुलांगु ज्यासना पुचः, कर्मचारी, समुदायया नेतृत्वय् च्वछायेबहगु योगदान यानादीपिं रामबहादुर केसी, धनकुमार नगरकोटी, प्रकाश नगरकोटी, ससिता नगरकोटी, सरस्वती नगरकोटीयात नं हनेज्या याःगु खः । थुकथं हे ज्याझ्वलय् संस्थाया म्येँ च्वयादीम्ह व हालादीम्ह सुरजवीर वज्राचार्य, संगीत संयोजक भूपेन्द्र वज्राचार्य, थःथःगु कार्यक्षेत्रय् योगदान बिउगु संघसंस्थायात नं हनेज्या याःगु खः ।

संस्थाया कार्यवाहक अध्यक्ष सुरजवीर वज्राचार्यया सभापतित्वय् जूगु ज्याझ्वलय् मूपाहांकथं बागमति प्रदेशया मन्त्री रामकृष्ण चित्रकार झायादीगु खः । गोदावरी नगरपालिकाया प्रमुख गजेन्द्र महर्जन विशेष पाहांकथं झायादीगु ज्याझ्वलय् यल महानगरपालिकाया उपप्रमुख मञ्जली शाक्य वज्राचार्य, बागमति गाउँपालिकाया अध्यक्ष वीरबहादुर लोप्चन, यल महानगरपालिका ११ वडाअध्यक्ष अरोजकुमार खड्गी, २२ वडाअध्यक्ष सागर तुलाधर, संस्थाया सल्लाहकार डा. शिलेन्द्र शाक्य, शाक्य सुरेन तथा कानूनी सल्लाहकार किरण शाक्य पिनिगु उपस्थिति दुगु खः ।

स्थापना दिवसया हे झ्वलय् संस्थाया संस्थाया म्येँ व वेबसाइट नं सार्वजनिक याःगु खः ।