हानं प्रधानन्यायाधीशया विवाद

येँ – न्हूम्ह प्रधानन्यायाधीश सिफारिस यायेत म्हिगः सःतूगु संवैधानिक परिषदया बैठक स्थगित जूगु दु । बैठक विषय प्रवेश जुइवं हे स्थगित जूगु खः । न्याम्ह न्हूपिं न्यायाधीश लिसें च्यागू आयोगया विषयय् नं निर्णय यायेगु धासें बैठक स्थगित जूगु खः । प्रमुख प्रतिपक्षी दल नेपाली कांग्रेसया सभापति शेरबहादुर देउवां म्हिगः पार्टी केन्द्रीय समितिया बैठक दुगुलिं फुक्कं विषयय् सहलह याये लाइ मखु धासें बैठक त्वःताः पिहां वंगु खः ।

आःया प्रधानन्यायाधीश ओम– प्रकाश मिश्रया कार्यकाल वइगु पुस १८ गते फुइत्यंगु दु । उकिया लछि न्ह्यः हे संवैधानिक परिषदया बैठकं न्हू वइम्ह प्रधानन्यायाधीशया नां सिफारिस यायेमाःगु व्यवस्था दु । सिफारिस लिपा संसदीय सुनुवाईया प्रक्रिया न्ह्याइ ।

न्याय परिषदं न्हूम्ह प्रधान– न्यायाधीशय लागिं वरिष्ठतम न्यायाधीश दीपकराज जोशी व न्यायाधीश चोलेन्द्र शम्शेर जबराया नां रोस्टर कथं छ्वःगु दु । थुपिं निम्ह मध्ये छम्हेसित प्रधानन्यायाधीशय् सिफारिस याइगु जूगुलिं आपाःसिनं चिउताः तयेगु यानाच्वंगु दु । थ्व स्वयां न्ह्यः सिफारिस जूम्ह जोशी संसदीय सुनुवाई समितिं अस्वीकृत जूगुलिं परिषद्या बैठकं छु निर्णय याइगु खः धइगु बारे आपाःसिनं चिउताः तयाच्वंगु खः ।

वने त्ययेकाः लाथेपाथे फैसला
छखे न्हूम्ह प्रधानन्यायाधीश ल्ययेगु खँय् अन्यौल वयाच्वंगु दुसा मेखे वहालवाला प्रधानन्यायाधीश ओमप्रकाश मिश्रं धाःसा थः वने त्ययेकाः सर्वोच्चय् लाथपाथे फैसला यानाच्वंगु द्वपं वःगु दु । वय्कलं थौंकन्हय् न्हापा थाति लानाच्वंगु थीथी कथंया व्यापारिक घरानिया व व्यवसाय सम्बन्धी मुद्दाया वहस सुरु यानाः उकियात याकनं याकनं सिधयेकेगु कुतः यानाच्वंगु खँ धाःगु दु । थौंकन्हय् लाभकरया खँय् तसकं विवादय् लानाच्वंगु एनसेल सम्बन्धी मुद्दाय् नं वय्कः अजूचायापुक न्ह्यःने वयादीगु खँ सूत्रं धाःगु दु ।

एनसेलं थौंकन्हय् नां चले जूपिं फुक्क हे धइथें कर्पोरेट मुद्दा स्वइपिं वकिलतय्त थःपिंसं बुक यानातःगु जुयाः एनसेल सम्बन्धी थ्व मुद्दाय् वहस यायेगु ज्या गुकथं न्ह्याइ धाये फयाच्वंगु मदु । शुक्रवाः जुइमाःगु थ्व मुद्दाया वहस नं स्थगित याःगु दु । एनसेलं लाभकर पुलेम्वाः धकाः सर्वोच्च अदालतं थ्व स्वयां न्ह्यः याःगु छगू फैसलां यानाः अर्बौं तका दां नेपाःयात दां दांछि हे कर मपुसे विदेशय् वनाच्वंगु दु । सर्वोच्चं एनसेलया पक्षय् फैसला याःगु खँय् नं थीथी कथंया आशंकात जुयाच्वंगु दु । आः नं एनसेलं मेगु पक्षं वहस याइपिं तक हे मदइ कथं फुक्क वकिलतय्त बुक यानातःगुलिं सकलें अजूचायाच्वंगु दु ।