नेपालय् लूगु न्हूगु भेरियन्ट गज्याःगु खः ?

येँ- नेपालय् नं कोरोना भाइरसया न्हूगु भेरियन्ट पुष्टि जुइवं थुकियात कयाः व्यापक रुपं चिउताः प्वंकेगु ज्या शुरु जूगु दु । नापं नेपालय् कोरोनाया महामारी आः गुगु ढंगं न्ह्याः वनीगु जुइ धकाः ग्याःचिकु नं उतिकं हे ब्वलंगु दु ।

स्वास्थ्य तथा जनसंख्या मन्त्रालयं भारतया छगू प्रयोगशालाय् नेपालय् संकलन यानातःगु स्वाबया नमूना परीक्षण याकूबलय् बी. १.६१७.१ भेरियन्ट व १.६१६.२ भेरियन्ट पुष्टि जूगु खः । थ्व पुष्टिया नापनापं लिपांगु इलय् नेपालय् व्यापक रुपं गुगु संक्रमितया ल्याः अप्वया वंगु खः, उकिया कारण थ्वहे न्हूगु भेरियन्ट खः धइगु खँ नं पुष्टि जूगु दु । थ्व न्हूगु भेरियन्ट परीक्षण यायेगु सुविधा नेपालय् मदुगुलिं जक भचा लिबाक थुकिया पुष्टि जूगु खः । तर नेपालय् थ्व न्हूगु भेरियन्टया भाइरस धाःसा ब्यापक रुपं न्यना वनेधुंकूगु अनुमान विज्ञतय्सं याःगु दु ।

वंगु लछि न्ह्यवंनिसें नेपालय् संक्रमितया ल्याः व्यापक जुइवं विज्ञतय्सं थ्व गनं न्हूगु भेरियन्टया कारणं जकं जूगु मखु ला धकाः आशंका याःगु खः । थ्वहे झ्वलय् भारतलिसे खुल्ला नाका दुगु सुदूर पश्चिमया प्रदेश विन्दुंनिसें थीथी थाय्या ३५ गू स्वावया नमूना संकलन यानाः भारतय् छ्वःगु खः । थ्व ३५ गू नमूना मध्ये ३४ गुलि भाइरसया न्हूगु भेरियन्ट लूगु खः ।

थ्व न्हूगु भेरियन्टं मनूया स्वास्थ्यय् गज्याःगु लिच्वः लाकी धइगु खँ आः तक प्रमाणित जुइक धाये मफुनि । अध्ययनतय्सं धाः कथं थुकिं फुक्क हे उमेर समूहया मनूतय्त ज्वनेफु । आः तक १८ निसें ५० दँयापिं मनूतय्त थुकिं अप्वः ज्वनाच्वंगु दुसां सीपिं धाःसा अप्वः यानाः ६० दँ च्वय्यापिं जक लानाच्वंगु दु ।

थौंकन्हय् नेपालय् कोराना विरुद्ध गुगु खोप बीगु ज्या जुयाच्वंगु खः, थ्व खोपं भाइरसया न्हूगु भेरियन्टयात पनेफुु वा मफु धकाः आः तक धाये मफुनि । तर निगुलिं खोप कयातयेधुंकूपिं मनूत न्हूगु भेरियन्टं कयाः सित धइगु दसि नं लूगु मदुनि । थ्व भेरियन्ट सरे जुइगु मात्रा धाःसा ५० प्रतिशत दुगु खँ विज्ञतय्सं धाःगु दु ।

याकनं सरे जुइगु कारणं आःयात थ्वपाखें बचेत जुइत भौतिक दुरी कायम यायेगु, मास्क तयेगु नापं आः तक नाला वयाच्वनागु सकतां स्वास्थ्य मापदण्ड पालना यायेगु मेगु विकल्प मदुगु खँ विज्ञतय्सं धाःगु दु ।
(बीबीसी नेपाली सेवाया ग्वाहालिं)

सम्बन्धित बुखँ

LEAVE YOUR COMMENTS