फेसबुकया प्रयोगकर्ता म्हो जुल

एजेन्सी- सामाजिक सञ्जाल फेसबुकया न्हियान्हिथंया सक्रिय प्रयोगकर्तातय् ल्याः कुहां वंगु दु । फेसबुक सुरु जुसां निसेंया १६ दँया इतिहासय् दकलय् न्हापांखुसी सक्रिय प्रयोगकर्ताया ल्याः म्हो जूगु खँ धाःगु दु ।

फेसबुक संचालन यानाच्वंगु कम्पनी मेटाया कथं सन् २०२१ या लिपांगु स्वलाय् दैनिक सक्रिय प्रयोगकर्ताया ल्याः १ अर्ब ९२ करोड ९० लाख थ्यंगु खः । थ्वयां न्ह्यःया स्वलाय् छगू अर्ब ९३ करोड सक्रिय प्रयोगकर्ता दुगु खः ।

मेटां टिकटक व युट्युब थें ज्याःगु प्रतिद्वन्द्वीतय्सं विज्ञापन यंकाच्वंगुलिं थःपिनिगु आम्दानी म्हो जुइफुगु खँ नं धाःगु दु ।
थ्व विवरण पिहां वःगु छुं घौ लिपा हे न्यूयोर्कय् मेटाया शेयरया भाः २० प्रतिशत स्वयां अप्वः कुहां वंगु खः । थुकिं कम्पनीया मुलय् थ्यंमथ्यं निसः अर्ब डलर नं म्हो जूग्ु दु ।

फेसबुकया प्रमुख कार्यकारी अधिकृत मार्क जकरबर्गं कम्पनी बिस्तारय् पंगः वयाच्वंगु कारण प्रतिस्पर्धी माध्यमय् ल्याय्म्हतय् आकर्षण अप्वया वनाच्वंगुलिं खः धाःगु दु ।

गुगल लिपा विश्वया निगूगु तःधंगु डिजिटल विज्ञापन प्लेटफर्म मेटा जुयाच्वंगु दु । तर एपलया अपरेटिङ सिस्टमं लागू याःगु गोपनीयता सम्बन्धी हिउपालं नं थःपिनि विज्ञापनय् प्रभाव लाःगु खँ मेटां धाःगु दु ।

एपलं हःगु हिउपालं ब्रान्डतय्त थः लक्षित समुदाय म्हसिइकेत व फेसबुक व इन्स्टाग्रामय् याःगु विज्ञापनयामापन यायेत थाकुका बिउगु खः । थुकिं यानाः थुगुसी मेटाय् १० अर्ब डलर तकया प्रभाव लायेफुगु मेटाया प्रमुख वित्तीय अधिकारी डेभ वेह्वनर धाःगु दु ।

मेटाया आम्दानी फुक्क धयाथें विज्ञापनपाखें वइगु खः । सन् २०२१ या लिपांगु स् वलाय् बजारया अनुमान अःखः ३३ अर्ब ६७ करोड डलर जक विज्ञापन वःगु खः । वइगु स्वलाय् थ्व आम्दानी म्हो जुयाः २७ अर्ब निसें २९ अर्ब डलरया दथुइ जक थ्यनीगु अनुमान दु ।
मेटां थौंकन्हय् टिकटकलिसे प्रतिस्पर्धा यायेत भिडियाय् लगानी यानाच्वंगु दु ।