
मनुखं मांअबुं तया बिउगु नां थःत मयल धाःसा हिलीगु सामान्य खँ खः । अथे हे थःगु थाय्बाय् हिलीगु नं सामान्य खः । अथे हे थःगु ज्याकूया नां हिलीगु नं छुं न्हूगु खँ मखु । तर थः च्वंच्वनागु त्वाः, थाय्बाय् वा जिल्ला मखु, देय्या हे नां हिउगु धाःसा आतक झीसं न्यने नंगु खइमखु । खय्तला छगू हे देय् निकू कुचा जुयाः नां हिलीगु धइगु मेगु हे सन्दर्भ जुल ।
विश्वय् स्वयेगु खःसा अज्याःपिं मनू म्हो हे जक दइ, अझ म्हो मखु दइ हे मखु धाःसां जिउ । गुम्हेसिनं थःगु देय्या हे नां हिली वा हिले फइ । तर अफ्रिकाया अन्तिम साम्राज्य देय् स्वाजिल्याण्डया जुजुया खँ धाःसा विश्वया आपालं देय्या शासक स्वयां फरक । थ्व हे अफ्रिकी साम्राज्यया लिपांगु देय् स्वाजिल्याण्डया जुजु मस्वाति तृतियं थःगु देय्या नां हे हिला बिउगु दु । नां हिउगु नं यक्व मदुनि । वंगु वाःया बुधवाः जक जुजु मस्वातिं थःगु देय्या नां हिउगु खः ।
जुजु मस्वातिं थःगु देय् स्वाजिल्याण्डया नां हिलाः आः ‘द किंगडम अफ इस्वातिनी’ तयेगु घोषणा याःगु खः । स्वाजिल्याण्ड स्वतन्त्र जूगु ५० दँ क्यंगु लसताय् जूगु छगू विशेष ज्याझ्वलय् जुजु मस्वातिं उकथं देय्या नां हिउगु आधिकारिक घोषणा याःगु खः । ‘इस्वातिनि’ स्थानीय भासं स्वाजीतय्गु मातृभूमि खः । देय्या नां पूर्व योजनाकथं मखसे आकस्मिक रुपं हिउगु खः ।
यद्यपिं जुजु मस्वातिं धाःसा ताःई न्ह्यवंनिसें हे थःगु देय्या नां स्वाजिल्याण्ड मधासे इस्वातिनी धकाः धायेगु याना वयाच्वंगु खः । सन् २०१७य् जक संयुक्त राष्ट्र संघया महासभायात संबोधन यायेगु झ्वलय् व व स्वयां न्ह्यः सन् २०१४ य् देय्या संसदया अधिवेशन उलेज्याया इलय् नं जुजु मस्वातिं थःगु देय्या नांयात इस्वातिनी धकाः छ्यःगु खः । जुजु मस्वातिया बारे छगू न्ह्यइपुगु खँ छु धाःसा वया झिंन्याम्ह कलाः दु ।
वयागु बारे औपचारिक रुपं बायोग्राफी च्वयाच्वंम्ह छम्ह च्वमिया कथं जुजु मस्वातिया अबुं देशय् ८२ दँ तक शासनसत्ता चले याःगु खःसा थ्व झ्वलय् वया १२५ म्ह कलाः दुगु खः । जुजु मस्वातिं औपचारिक ज्याझ्वलय् उकथं विना पूर्व तयारी आकाझाकां देय्या नां हिलागु घोषणा याःगुयात कयाः छुं छुं मनूतय्सं असन्तुष्टि प्वंका वयाच्वंगु दु । इमिगु धापू दु कि, ‘ जुजुं थःगु ध्यान देय्या आर्थिक व्यवस्था बल्लाकेगुपाखे केन्द्रीत यायेमाः, देय्या नां हिलेगु खँय् मखु ।’
LEAVE YOUR COMMENTS