इमरान खानयात जमानत

एजेन्सी- पाकिस्तानया पुलांम्ह प्रधानमन्त्री व पाकिस्तान तहरीक ए इंसाफ पार्टीया अध्यक्ष इमरान खानयात भ्रष्टाचारया मामिलाय् बियातःगु जेल सजाययात इस्लामाबाद हाइकोर्ट पनाबिउगु दु । इस्लामाबाद हाइकोर्टया मू न्यायाधीश आमिर फारकं मंगलबाः छगू संक्षिप्त फैसला न्यंकुसें खानया जमानत बीत आदेश बिउगु खः । थुकिया विस्तृत फैसला छुं ई लिपा वइगु खँ अदालतं धाःगु दु ।

इस्लामाबाद हाइकोर्टं जमानत बिउसां इमरान खानयात त्वःती कि त्वःतीमखु धयागु स्पष्ट मजूनि । थ्व फैसला वये न्ह्यः खानया वकिलं वयात मेगु छुं नं मामिलाय् मज्वनेत नं हाइकोर्टयात अपील याःगु खः ।

इस्लामाबादया जिल्ला अदालतं वंगु ५ अगस्टय् खानयात भ्रष्टाचारया मामिलाय् दोषी करार यासें स्वदँया जेल सजाय व छगू लाख तका जरिवाना न्यंकूगु खः । जिल्ला अदालतया फैसला लिपा प्रहरीं खानयात ज्वनाः जेलय् यंकूगु खः ।