एमसीसीयात त्वहः दयेकाः गठबन्धन तछ्यायेगु ग्वसाः

येँ – जेठय् स्थानीय चुनाव यायेगु सहमतिया नाप नापं प्रधानमन्त्री शेरबहादुर देउवां सत्ता गठबन्धन त्वाःथलेगु रणनीति नं न्ह्यःने हःगु दु । थुकिया लागिं त्वहःया रुपय् वय्कलं एमसीसीयात न्ह्यःने हयादीगु दु ।

प्रम देउवां अमेरिकापाखें थःत यक्व हे ‘दबाब’ वयाच्वंगु दु धासें एमसीसी थ्वहे संसदपाखें पारित याकेमाःगु प्रस्ताव न्ह्यःने हयादीगु खँ सीदुगु दु । थुकिया लागिं वय्कलं गठबन्धनय् दुथ्याःगु माओवादी व नेकपा (एस) या नेतातलिसे खँल्हाबल्हा नं न्ह्याकादीगु दु । यदि एमसीसी पास याये मफुत धाःसा थःपिंसं गठबन्धनय् दुमथ्याःगु मेगु दललिसे जानाः जूसां पारित याये माली धासें अज्याःगु अवस्थाय् गठबन्धन भंग जुइगु ख्याच्वः बियादीगु खँ सूत्रं धाःगु दु ।

नेपालं थ्वहे वइगु फेब्रुअरी दुने नं एमसीसी पास मयात धाःसा अमेरिकां थ्व सम्झौता भंग यानाः दां लित यंकेगु जुइ धकाः नेपाःयात ‘दबाब’ बिया हःगु सूत्रया दावी दु । छुं जुयाः एमसीसी लिहां वन धाःसा ध्यबा जक लिहां वनीगु मखुसें थुकिं यानाः अन्तर्राष्ट्रिय ख्यलय् नेपाःया छबी समेत स्यनीगु जूगुलिं थ्व सम्झौता न्ह्याथे यानाः नं पारित याये माःगु खँ प्रमं धयादीगु खँ नं सीदुगु दु ।

प्रम देउवायात थौंकन्हय् पार्टी दुने चुनाव जुल धाःसा उकी पार्टी याकःचा हे ल्वायेमाः, गठबन्धन यानाः ल्वाये मजिउ धकाः नं दबाब वयाच्वंगु दु ।

एमाले विभाजित अवस्थाय् लानाच्वंगु जुयाः कांग्रेसया लागिं थ्व बांलाःगु अवसर खः धासें देउवायात गठबन्धन भंग यानाः याकःचा हे चुनावय् वनेगु सल्लाह वय्कःया सतीपिंसं समेत बियाच्वंगु दु । उकिं प्रम देउवां गठबन्धन भंग यायेगु त्वहःया रूपय् एमसीसीयात प्रयोग यायेत्यंगु अनुमान याना हःगु दु । उकिं हे वय्कलं यदि गठबन्धन कायम याना तयेगु खःसा एमसीसी पारित यायेमाः धइगु शर्त न्ह्यःने तये हःगु खँ धाःगु दु । सूत्रया कथं माल धाःसा एमालेलिसे जानाः जूसां एमसीसी पारित यायेत तकं प्रम देउवा तयार जुयाच्वंगु दु ।

सम्बन्धित बुखँ

LEAVE YOUR COMMENTS