वाः पी त्ययेकाः नं साः न्यायेगु मदयाः ख्वपया किसान हैरान

ख्वप – वाः पिइ हथाय् जूसां साः कायेमखंपिं ख्वपया किसानतय्सं सिडियो ज्याकुथिइ धर्ना बिउगु दु । सिद्धिगणेश बचत तथा ऋण सहकारी संस्था, संगम बचत व समय बचत लगायत थीथी सहकारी संस्थापाखें सुलभ मूल्यया साः वितरण यानाच्वंसां माक्वः साः महःगुलिं किसानत हैरान जुयाच्वंगु दु ।

साः कायेमफयाः गुलिसिया बुँइ लः दयाः नं वा पिइ मफयाच्वंगु खँ स्थानीय किसानतय्सं धाःगु दु । वंगु वालय् सिद्धिगणेश बचत तथा ऋण सहकारी संस्थां थःपिनि डिपो कमलविनायकय् ५० बोरा जक साः पन्तिं हःगु खः । कृषि सामग्री संस्थानं छगू सहकारीयात ५० बोरा जक साः बिइगु नियम दयेकेवं उलि जूसां साः हयागु खँ सहकारीं धाःगु दु । अन साः काःवःपिं धाःसा स्वसः स्वयां अप्वः थ्यंगु खः ।

अथे जूबलय् वाः पिइ हथाये जुइधुंकूसां नां च्वःगु इलय् ५० म्ह स्वयां लिउने लाःपिंत साः कायेमखन । थथे साः कायेमखपिं वनाः प्रमुख जिल्ला अधिकारी नारायणप्रसाद भट्ट थाय् धर्ना च्वंवंगु खः । पुलांम्ह जिल्ला विकास समितिया सभापति व नेपाल क्रान्तिकारी किसान संघया केन्द्रीय उपाध्यक्ष गोबिन्द दुवालया नेतृत्वय् धर्ना च्वंवंपिं प्रमुख जिल्ला अधिकारीयात ज्ञापनपत्र लःल्हाःगु खः ।

थथे धर्ना च्वनेधुंकाः निगू प्यंगू वडाया निंतिं धाःसा तप्यंक हे कृषि सामग्री संस्थानय् फोन यानाः साः हयाबिउगु खँ धाःगु दु । ख्वप नगरपालिकाया न्याक्वःगु नगर परिषदय् न्ववानादिसें प्रजिअ भट्टं आः सहकारी मार्फत् मखुसे वडा कार्यालय मार्फत् झिगुलिं वडाय् साःया व्यवस्था यायेगु खँ धयादीगु दु ।

प्रजिअं वडामार्फत साः वितरण यायेगु धाःसां साः हया मबिउगुलिं गुलिखे किसानतय्सं थिकेक भाः पुलाः साः न्यायेमालाच्वंगु दु । सहुलियत दरं ९५० तका जक तूगु साःयात झिंछसः तकं पुलाः यंकेमाःगु खँ छम्ह पीडित किसान गणेशमाया कुस्मां कनादिल ।