बाहिरी चक्रपथया डिपिआर हे मेगु

येँ – बाहिरी चक्रपथ दयेकेगु निंतिं हाकनं न्हूगु डिपिआर दयेकेमाःगु अवस्था वःगु दु । उपत्यका विकास प्राधिकरणया आयुक्त डा. भाईकाजी तिवारीं डिपिआर पुलांगु जूगुलिं बाहिरी चक्रपथ दयेकेगु सम्भव मजूगु खँ धाःसां नं विशेष यानाः उगु क्षेत्रया जग्गा चिचीकू यानाः कित्ताकाट यानातःगुलिं आः हाकनं न्हूगु डिपिआर दयेकेमाःगु खँ धाःगु दु ।

शहरी विकास मन्त्री मोहमद इस्तियार राईं बाहिरी रिङरोडय् चलखेल जूगु धासें उगु थाय्या अलाइन्टमेन्ट हे हिलेमाःगु खँ कनादी । वय्कलं अन भूमाफियातय्सं जग्गाय् चलखेल याःगु धासें आः दयेकातःगु अलाइन्टमेन्ट स्वयां ५०० मिटर जःखः कायम यायेगु कथं तयारी नं यानाच्वंगु खः ।

न्हूगु डिपिआर दयेकेगु तयारी जुयाच्वंगु दुसा थ्व स्वयां न्ह्यः च्यागू डिपिआर दयेकेगु ज्या जुइधुंकूगु दु । बाहिरी चक्रपथ लागाय् स्थानीय जनता सिबें पिनें वयाच्वंपि राजनैतिक नेतात, उच्चस्तरीय कर्मचारी व भूमाफियां प्रशस्त जग्गा न्यानातःगु लूगु दु । बाहिरी चक्रपथया नक्सा न्हापा हे ल्हातय् लाकाः लँ लाइगु थासय् वनाः भूमाफियातय्सं जग्गाय् लगानी यानातःगु खँ धाःगु दु ।