सांसद, मेयरया गाडीइ जनमत पार्टीया आक्रमण

येँ – सीके राउतं नेतृत्व यानाच्वंगु जनमत पार्टीया कार्यकर्तातय्सं जनकपुरय् म्हिगः मधेश प्रदेशया सांसद अशोक यादव लिसें हरिवन नगरपालिकाया मेयर गणेश प्रसाईं च्वना वःगु गाडीइ आक्रमण यानाः तोडफोड याःगु दु । राष्ट्रिय सभा चुनावय् मतदान याः वनाच्वंपिं वय्कःपिनि गाडीइ जानकी मन्दिरया न्ह्यःने अप्पां कयेकेगु लिसें कथिं दयाः क्षति याना बिउगु खः । आक्रमणपाखें बचे जुइत सांसद व मेयरपिंत प्रहरीं सुरक्षा बियाः बिसिके यंकेमाःगु खः । गाडी तोडफोड याःपिं छुं मनूतय्त प्रहरीं ज्वंगु दु ।

महेन्द्र नारायण निधि स्मृति प्रतिष्ठानपाखे जनमत पार्टीया कार्यकर्तात वनेत्यंगु इलय् प्रहरीं पनेत स्वयेवं ल्वापु शुरु जूगु खः । प्रदर्शनकारी व प्रहरी दथुइ ल्वापु जुइवं प्रहरीं टियर ग्याँस कयेकूगु खः । वयां लिपा जनमतया कार्यकर्तातय्सं लँय् वक्व सरकारी गाडीइ आक्रमण शुरु याःगु खः ।

न्हापा हे घोषणा यानातःगु ज्याझ्वः कथं म्हिगः जनमत पार्टीं मुख्यमन्त्री लालबाबु राउतयात ज्ञापन पौ बीगु तयारी याःगु खः । तर मुख्यमन्त्री राउतं ज्ञापन पौ कायेत अस्वीकार याःगुलिं मुख्यमन्त्री गन नाप लात अन हे ज्ञापन पौ बीगु धकाः जनमत पार्टीं प्रदर्शन याःगु खः ।

प्रहरीलिसे ल्वापु जुइवं जनमतया कार्यकर्तातय्सं लँय् वयाच्वंगु डाक्टर, सांसद व स्थानीय जनप्रतिनिधिया गाडीइ आक्रमण याःगु दु । थःगु गाडीइ च्वनाः बर्दिबासपाखे वनाच्वंम्ह जलेश्वर अस्पतालया चिकित्सक डा. सतिस साहयात नं उमिसं आक्रमण याःगु खःसा उकी लानाः डा. साह घाःपाः जूगु दु । आक्रमणय् लानाः डा. साहया म्हुतुइ च्यागू टाका तयेमाःगु खँ धाःगु दु ।

जनमत पार्टीं किसानतय्त साः, पुसा व्यवस्था यायेमाःगु, किसानयात क्षतिपूर्ति बीमाःगु, बालीया उचित भाः कायम यायेमाःगु माग यासें ताः ई न्ह्यवंनिसे प्रदर्शन याना वयाच्वंगु खः । थ्वहे झ्वलय् पार्टीं न्हय्गुलिं प्रदेशय् ज्ञापन पौ बीगु तयारी यानाच्वगु खँ सीदुगु दु ।