ओलीविरुद्ध दाहाल-नेपालया भेला

४४ म्ह स्थायी कमिटीया दुजः मध्ये ३० म्ह भेलाय् सहभागी

येँ (नेपालभाषा टाइम्स) – प्रधानमन्त्री केपी ओलीयात थःगु पद बचे यायेत आः वइगु ई झन थाकुइगु खनेदुगु दु। सत्तारुढ नेकपाया स्थायी कमिटीया ४४ म्ह दुजःपिं मध्ये ३० म्ह दुजः ला आः हे ओलीया विपक्षीपिनि दथुइ जूगु गुटगट भेलाय् हे थ्यंगु दु। थौंकन्हय् न्ह्यानाच्वंगु स्थायी कमिटीया बैठकय् न्ववाःपिं अप्वः धयाथें दुजःपिंसं नं ओलीं अध्यक्ष व प्रधानमन्त्री निगुलिं पदं राजीनामा बीमाः धकाः न्ववायेधुंकूगु दु ।

ओलीया राजीनामा फ्वना वयाच्वंम्ह मेम्ह अध्यक्ष पुष्पकमल दाहाल व नेता माधव नेपालं म्हिगः यल झम्सिखेलया छगू रष्टुराँय् स्थायी कमिटीया नेतातय् छगू भेला याःगु खः । थ्व भेलाय् ३० म्ह स्थायी कमिटीया दुजःपिं थ्यंगु खः । थुकी न्हापा प्रधानमन्त्रीयात साथ बिया वयाच्वंम्ह गृहमन्त्री रामबहादुर थापा लिसें कृषि मन्त्री घनश्याम भुसाल तकं थ्यंगु दु। अथेहे पर्यटनमन्त्री योगेश भट्टराई म्हिगःया भेलाय् मथ्यंसां थःत उगु भेलाय् जूगु निर्णयय्सहमति दुगु खँ धाःगु खँ सीदुगु दु ।

थ्व भेलाय् स्थायी समितिया बैठकय् फयांफक्व सर्वसहमतिं हे ओलीयात राजीनामा बीकेगु व मखुसा बहुमतं जूसां राजीनामा बीकेगु निर्णय जूगु खः । अथेहे यदि ओलीं वार्ता यायेगु कुतः याःसा पार्टीं छु निर्णय यात व माने जुइगु खः धयागु बचं बिल धाःसा जक वार्ताय् च्वनेगु खँ नं जूगु सीदुगु दु ।

म्हिगःया भेलां प्रधानमन्त्रीयात राजीनामा बीकेगु निंतिं दबाब बीगु व ओलीं राजीनामाया विकल्पय् छु यायेफु धयागु बारे सहलह जूगु खँ धाःगु दु। बैठकय् ओलीं काचाक्क राजीनामा बीमखुगु व वयागु विकल्पय् मेगु छुं नं कथंया निर्णय यायेफु धयागु बार सहलह जूगु खँ सीदुगु दु । ओलीं संकटकाल लागू यायेफुगु, संसद विघटन यायेफुगु वा संसदय् बहुमत सावित यायेत स्वयेफु धयागु विकल्प बार सहलह जूगु खः ।

विशेषतः प्रधानमन्त्रीं वंगु निन्हु स्वन्हुया दुने राष्ट्रपतियात तःक्वः हे नापलाःगुलिं संकटकाल जकं लागू यायेत्यंगु मखुला धयागु बार सहलह जूगु  खँ धाःगु दु। राष्ट्रपति विद्यादेवी भण्डारीं प्रधानमन्त्री ओलीयात न्ह्यागु ज्याय् नं तुरुन्त समर्थन याइगु जूगुलिं संकटकाल लागू यायेफुगु धयागु विश्लेषण जुयाच्वंगु खः । थ्व बाहेक संसद विघटन यायेफुगु बारे नं सहलह जूगु खःसा यदि संसद् विघटन यात धाःसा उकियात अदालतं तुरुन्त उल्टे यानाबीगु विश्लेषण जूगु दु। अथेहे संसदय् बहुमत सावित यायेत स्वःसां नेकपा संसदीय दलय् ओलीया बहुमत मदुगु खँ जूगु खः ।

दाहाल-नेपाल गुटया बैठक जुइ न्ह्यः म्हिगः सुथय् प्रधानमन्त्री ओलीं नं थुपिं नेतातय् पक्षय् दु धयातःपिं नेतातय्त बालुवाटरय् सःताः थःत ग्वाहालि यायेमाल धाःगु खः ।

सम्बन्धित बुखँ

LEAVE YOUR COMMENTS