थनिं निसें हे जाःगु ग्यास

येँ (रासस) – आइतवाः निसें एलपिजी ग्यासया पूवंक जाःगु सिलिन्डर हे मीगु सुरु जूगु दु । लकडाउन जुइधुंकाः सरकारं बछि जक जायेका ग्यासे मीत निर्देशन बिउगु खःसा आः स्टक अप्वः दयेवं आइतवाः निसें हे जाःगु ग्यास मीगु सुर याःगु खः ।

नेपाल आयल निगमं फुक्क ग्यास उद्योगतय्स १४.२ किलो हे दुगु ग्यास बजारय् छ्वयेधुंकूगु खँ धाःगु दु । स्वनिगलय् जक ३५ निसें ४० हजार ग्यास सिलिन्डर छ्वयेधुंकूगु खँ निगमया प्रवक्ता विनितमणि उपाध्यायं धयादीगु दु ।

वय्कलं भारतीय नाकापाखें गाक्क ग्यास बुलेट दुहां वयाच्वंगुलिं ग्यासया अभाव मदु । नेपाल एलपी ग्यास उद्योग संघया अध्यक्ष गोकुल भण्डारीं नं फुक्कं उद्योगीतय्सं थःथःपिनि डिलरपाखें बजारय् जाःगु ग्यास हे छ्वयेधुंकूगु खँ धयादीगु दु । वय्कलं फुक्कं ग्यास उद्योगतय्के १० हजारटन बराबर ग्यास मौज्दात दुगुलिं ग्यासया अभाव मजुइगु खँ धयादीगु दु ।