वैशाखय् स्थानीय निर्वाचन यायेगु सहमति

येँ -सत्तारुढ गठबन्धनं आः वइगु वैशाखय् स्थानीय तहया निर्वाचन यायेगु सहमति याःगु दु । निन्हु लिपा च्वनीगु बैठकं स्थानीय तहया निर्वाचनया तिथि नं क्वःछीगु खँ धाःगु दु । म्हिगः च्वंगु सर्वदलीय बैठकय् थःथःगु पार्टी दुने सहलह यानाः कन्हय् च्वनीगु सत्तारुढ संयन्त्रया बैठकपाखें चुनावया मितिइ सहमति कायम यायेगु व उकियात हे मन्त्रिपरिषदं निर्णय याकेगु समझदारी जूगु खँ माओवादीया प्रमुख सचेतक देव गुरुङं कनादीगु दु ।

निर्वाचन आयोगं वैशाखय् स्थानीय तहया निर्वाचन यायेगु बारे राजनीतिक पार्टीया ध्यानाकर्षण यायेवं सत्तारुढ गठबन्धनया बैठकय् थुकिया बारे सहलह जूगु खः । म्हिगःया बैठकय् संविधान व कानुनं क्वःछिनातःगु व्यवस्था कथं इलय् हे चुनाव यायेमाःगु खँय् सहलह जूगु खः ।

नेता गुरुङया कथं निर्वाचनया तिथि क्वःछीत गठबन्धनय् दुथ्याःगु दलतय्सं थःथःपिनि पार्टी दुने आन्तरिक सहलह यानाःलि निर्वाचनया तिथि क्वःछीगु खँ धासें धयादिल, ‘निर्वाचनया मिति बारे क्याबिनेटं निर्णय याये स्वयां न्ह्यः थःथःगु दलय् निं परामर्श यानाः निन्हुया दुने क्वःछीगु खँ जूगु दु ।’

म्हिगःया बैठकय् प्रधानमन्त्री शेरबहादुर देउवा, नेकपा (माओवादी केन्द्र) या अध्यक्ष पुष्पकमल दाहाल, जनता समाजवादी पार्टी संघीय परिषदया अध्यक्ष डा. बाबुराम भट्टराई, समितिया संयोजक रामचन्द्र पौडेल, राष्ट्रिय जनमोर्चा नेपालया दुर्गा पौडेलपिसं ब्वति काःगु खः ।

एकीकृत समाजवादीया अध्यक्ष माधव नेपाल धाःसा कोरोना संक्रमित जुयाः बैठकय् मवःगुलिं उपमहासचिव गंगालाल तुलाधरं ब्वति कयादीगु खः । थ्व स्वयां न्ह्यः स्थानीय निर्वाचन बारे प्रधानमन्त्री देउवा व माओवादी अध्यक्ष दाहाल दथुइ नं सहलह जूगु खः ।

अथे हे निर्वाचन आयोगं याकनं निर्वाचनया मिति घोषणा यायेत सरकारयात इनाप याना वयाच्वंगु खः । आयोगं संविधान व स्थानीय तह निर्वाचन ऐन कथं स्थानीय सरकार धइगु छन्हु नं जनप्रतिनिधिविहिन याये मजिउगु कारणं तत्काल निर्वाचनया तिथि क्वःछीत इनाप याना वयाच्वंगु खः ।

सम्बन्धित बुखँ

LEAVE YOUR COMMENTS