सामाजिक विधि व्यवहारयात कयाः सहलह
येँ – न्यत तुलाधर समितिं सामाजिक विधि व्यवहारयात कयाः सहलह ब्याकूगु दु । बुरांख्यःस्थित समितिया थःगु हे छेँय् जूगु ज्याझ्वलय् संस्कृति व सामाजिक विधि व्यवहारय् वयाच्वंगु विकृतियात कयाः उकथंया ज्याझ्वः जूगु खः । समितिया नायः संसारधर तुलाधरया सभापतित्वय् छ्याञ्जे ज्ञानेन्द्ररत्न तुलाधरं लसकुस यानादीगु ज्याझ्वलय् नवानादीपिंसं विधि व्यवहार हनेगुलिइ वयाच्वंगु विकृतियात सुधार याना यंकेमाःगु खँय् बः बियादीगु खः ।
ज्याझ्वलय् उदाय समाज विधि व्यवहार उपसमितिया संयोजक सुमित्रा तुलाधरं विधि व्यवहार यायेबलय् छु छु याये जिउ, छु छु मजिउ धइगु दक्वं खँ न्ह्यथनाः सम्झौता हे याना वनेमाःगु अवस्था वयाच्वंगु दु धयादिल । थःपिं समाजया दुजः जुयाः ज्या यानाबलय् विधि व्यवहारय् सुधार हयेगु निंतिं न्ह्याकागु पलाःया बारे कनादिसे समितिया संरक्षक सागरमान तुलाधरं उदाय समाजया नियमयात बांलाक कःघाना वनेमाः धयादिल।
अथे हे उदाय समाज मिसा पुचःया नायः कीर्ति तुलाधरं उदाय समुदाय दुने विधि व्यवहार यायेगु ज्याय् तसकं तच्वः जुया वनाच्वंगु खँ कनादिसें मगाः मचाः धइगु खँय् ब्वाँय् मवँसे सीमित रुपय् ज्या क्वचायेकेगु स्वयेमाः धयादिल ।
समाजया मू दुजः डा. सुमनकमल तुलाधरं विधि व्यवहार नियन्त्रण यायेगु धकाः म्हुतुं अःपुक धयाच्वंसां नं व्यवहारय् उकियात नियन्त्रण यायेत थाकु धासें नियमन हे याना वनेमाःगु खँय् बः बियादिल । ज्याझ्वलय् नवानादीपिं मेमेपिं वक्तापिंसं नं विधि व्यवहारय् सुधार हयेमाल जक धायेगु स्वयां थः हे दकलय् न्हापां न्ह्यचिलेमाःगु खँय् बः बिउगु खःसा निगू पुचः दयेकाः विधि व्यवहारयात कयाः सहलह नं ब्याकूगु खः ।
LEAVE YOUR COMMENTS