ख्वाःपाः प्याखंयात कयाः प्रस्तुतिकरण

येँ(नेपालभाषा टाइम्स)- नेपाल संगीत तथा नाट्य प्रज्ञा प्रतिष्ठानया ग्वसालय् ख्वाःपाः प्याखंयात कयाः छगू प्रस्तुतिकरण ज्याझ्वः जुल । ज्याझ्वलय् थिमिया संस्कृतिविद्लिसें भाषाह्यमि गणेशराम लाछिं ज्यापौ न्ह्यब्वयादीगु खः।

ज्यापौ न्ह्यब्वयादिसें संस्कृतिविद् लाछिं लिच्छवीकालनिसें शुरु जूगु ख्वाःपाः प्याखं नेपाःया सांस्कृतिक धरोहर जूगु खँ धयादिल । नेपाली संस्कृतिइ हुलाप्याखं छगू अभिन्न अंग जूगु व उकिसनं ख्वाःपाः प्याखं अतिकं महत्वपूर्ण जूगु खँ कनादिल ।

थःगु प्रस्तुतिकरण बीगु झ्वलय् वय्कलं हुलाप्याखं सम्बन्धी अभिलेख न्ह्यब्वयादिसें स्वनिगः व उकिया जःखःया जिल्लाय् परापूर्वकालनिसें न्ह्याना वयाच्वंगु ख्वाःपाः प्याखं आतक नं अस्तित्वय् दयाच्वंगु धासें थुकिया संरक्षण यायेमाःगु विचाः तयादिल ।

संस्कृतिविद् पुरुषोत्तमलोचन श्रेष्ठं मानव संस्कृति मानव संस्कृति व सभ्यताय्् ख्वाःपाः संस्कृति विश्वव्यापी जूगु विचाः तयादिल । ख्वाःपाः प्याखंया आपालं प्रकार व विधि दुगु चर्चा यानादिसें वय्कलं नेपालमण्डलया परम्परागत ख्वाःपाः प्याखं प्याखनय् जक सीमित मजूसे देव गण व पात्र प्रत्यक्ष द्यःया अवतारया रुपय् मान्य प पुज्य जुया वयाच्वंगु दु धयादिल।

वरिष्ठ नृत्य निर्देशकलिसें अनुसन्धानदाता भैरवबहादुर थापां मानव भाषाया उदय हे मजूनिगु इलय् मनूतय्सं सांकेतिक भाषाया प्रयोग यायेगु नापं अभिनय कलाया विकास जुयाः ख्वाःपाः कलाया विकास जूगु खः धयादिल ।

प्रतिष्ठानया सदस्य सचिव श्याम तमोटं ख्वाःपाः प्याखंया प्रचार प्रसार व संरक्षणया निंतिं विशेष योजना तयार यानागु जानकारी बियादिल ।