स्थानीय सरकार कर्मचारीयात बीगु षडयन्त्र ?

येँ – नेकपा एमालेया अध्यक्ष केपी शर्मा ओलीं स्थानीय तहतय्त सरकारं प्रतिनिधिविहिन यानाः मुक्कं स्थानीय तह कर्मचारीयात जिम्मा बीगु षडयन्त्र यानाच्वंगु द्वपं बियादीगु दु ।

संखुवासभाय् च्याक्वःगु जिल्ला अधिवेशनया उलेज्या यासें अध्यक्षं ओली कानुन कथं फागुनय् चुनाव यायेमाःगु खःसां नं सरकारं गुगुं नं कथंया तयारी मयाःगु द्वपं नं बियादीगु दु ।

सम्बोधनया झ्वलय् वय्कलं धयादिल, ‘चरणवद्ध स्थानीय तहया चुनाव जूसां नं न्हापांगु चरणया चुनावयात माने यानाः व स्वयां निला न्ह्यः चुनाव यायेमाःगु खः, फागुनय् स्थानीय तहया चुनाव क्वचायेकेमाःगु खः तर फागुनय् चुनाव याइगु गुगुं नं कथंया सम्भावना मदु । छाय् धाःसा थ्व सरकार लुटमारय् न्ह्यानाच्वंगु दु, चुनावपाखे मखु ।

स्थानीय तहयात जनप्रतिनिधि विहिन यायेगु व कर्मचारीपाखें चले यायेगु षडयन्त्र जुयाच्वंगु दु । ’ उकथं हे वय्कलं एमालेया सरकार मदुगुलिं स्थानीय तहया चुनाव यायेत निगू दशक ई काःगु खँ नं धयादिल ।

स्थानीय तहया चुनाव वैशाखं यायेगु धकाः निर्वाचन आयोगं मिति सिफारिस याःसां सरकारं धाःसा छुं निर्णय याःगु मदुनि । देय्न्यंकंया स्थानीय तहलय् एमालेया बहुमत दुगु जूगुलिं वर्तमान गठबन्धन सरकारं स्थानीय तहया म्याद थपे याइगु सम्भावना मदु । बरु फुक्क स्थानीय सरकार भंग यानाः अन कर्मचारीपाखें सरकार चले याकेफु धकाः अनुमान जुयाच्वंगु दु ।

सम्बन्धित बुखँ

LEAVE YOUR COMMENTS