थाइ जुजुपाखें भिक्षु सुगन्धयात अति विशिष्ट राजकीय सम्मान

येँ- थाइल्याण्डया जुजु महाबजिरालङ्कनं नेपाःमि भिक्षु डा. सुगन्ध महास्थविरयात अति विशिष्ट महत्वया राजकीय सम्मान बीगु जूगु दु । थाइ जुजु महाबिजरालङ्कनं नेपाःया भिक्षु डा. सुगन्ध महास्थविरयात अति विशिष्ट धार्मिक महत्वया राजकीय सम्मान ‘फ्रा धम्माशाक्यवंशीवसुत’ पदवी बीत्यंगु खः ।

थाइ राज संस्था व थाइल्याण्डया बौद्ध संघं बीत्यंगु उगु पदवी देय्या स्वंगू तःधंगु पदवी खः । उगु सम्मानं सम्मानित जुया बिज्यायेत्यंम्ह भिक्षु डा. सुगन्ध महास्थविर न्हापांम्ह नेपाःमि भिक्षु खः ।

थ्व स्वयां न्ह्यः भिक्ष डा. सुगन्धयात प्यंगूगु तहया देवसम्मानं सम्मानित याःगु खः । करिब दछि न्ह्यः वसपोलयात ‘फ्रा देवशाक्यवंशपण्डित’ पदवीपाखें सम्मान याःगु खः ।
थाइ जुजुपाखें भिक्षु डा. सुगन्धयात आः बीत्यंगु पदवी विश्व बौद्ध जगतय् हे अतिकं सम्मानित व गौरवमय पद्वीया रुपय् कायेगु याः । झण्डै प्यंगू दशक न्ह्यवंनिसें थाइल्याण्डय् च्वनाः वसपोलं बुद्ध धर्म, बुद्धशासन व बुद्ध शिक्षाया निंतिं योगदान बिया वयाच्वनाबिज्याःगु दु ।

थाइल्याण्डया उत्तरी क्षेत्रया क्षेत्रीय गर्भनर जुयाच्वना बिज्याःम्ह वसपोल थाइल्याण्डया हे नांजाःगु महामुकुट बौद्ध विश्वविद्यालयया डेपुटी रेक्टर नं खः । लिसें वसपोल थीथी बौद्ध विश्वविद्यालयय् नं आवद्ध जुया च्वना बिज्याःगु दु ।