छम्ह हे नेवाः मन्त्री मदुगु सरकार

पोखरेल व यादव उपप्रधानमन्त्री जूगुलिं बादल असन्तुष्ट

येँ – संघीय समाजवादी फोरम नं समावेश जुइधुंकाः प्रधानमन्त्री केपी ओलीया सरकारं पूर्णता प्राप्त याःगु दु । तर ओलीया थुगु पूर्णता ग्रहण याःगु सरकारय् नेवाः मन्त्री धाःसा छम्ह हे मलाः । वय्कःया मन्त्रिमण्डलय् २४ म्ह फुल मन्त्री व स्वम्ह राज्यमन्त्री दु । तर नेवाः धाःसा छम्ह हे मदु । एमालेपाखें येँय् कृष्णगोपाल श्रेष्ठ, रामवीर मानन्धर, जीवनराम श्रेष्ठ आदिपिं चुनाव त्याकाः हे संसदय् थ्यंगु खःसां वय्कःपिंत अवसर मबिल ।

थ्व स्वयां न्ह्यः पञ्चायती व्यवस्थाय् तकं हरेक मन्त्रिमण्डलय् कम से कम नं छम्ह नेवाःयात दुथ्याकेगु चलन दुगु खः ।
संसफोयात नं मन्त्रिमण्डलय् दुथ्याकेगु झ्वलय् प्रधानमन्त्री ओलीं संसफो अध्यक्ष उपेन्द्र यादव व पुलांम्ह एमालेया नेता ईश्वर पोखरेलयात उपप्रधानमन्त्री दयेकूगु खँय् धाःसा पुलांम्ह माओवादी नेता लिसें गृहमन्त्री रामबहादुर थापा बादल धाःसा तम्वःगु खँ सीदुगु दु ।

माओवादीं बादलयात नं उपप्रम सहित गृह बीत माग याःगु खःसां ओलीं उकियात अस्वीकार याःगु खः । आः निम्ह उपप्रम तयेवं यादव दोश्रो वरियता त्वःतूगु दुसा पोखरेलयात पार्टी एकीकरणया इलय् जूगु डिमोसन सन्तुलन मिले यायेगु ज्या जूगु दु ।

मन्त्री दावी यायेत नेवाः म्याण्डेट मगाःनि
संघीय समाजवादी फोरम सरकारय् वन धाःसा मन्त्री जुइ धकाः अनुमान जुयाच्वंम्ह पार्टी सहअध्यक्ष राजेन्द्र श्रेष्ठं पार्टी दुने मन्त्री पदया दावी यायेत नेवाःतय् म्याण्डेट मगाःनि धयादीगु दु । वय्कःयात मन्त्री मदयेकूगु खँय् थीथी कथंया टिप्पणी जुयाच्वंगु बारे स्पष्ट यासें वय्कलं स्वनिगःपाखें संघीय समाजवादी फोरमयात यक्व भोट मवःगु जूगुलिं अन दुने नेवाःतय्त नं मन्त्री दयेकेमाः धकाः दावी याः वने मछिं धयादिल ।

स्वनिगःया नेवाःतय्सं म्याण्डेट बिउगु ला एमाले व माओवादीयात खः, उकिं वहे पार्टीपाखें नेवाःतय्त मन्त्री दयेकेमाःगु बिचाः नं वय्कलं तयादिल । थःत मन्त्री मदयेकूगु खँय् थःपिनि छुं हे कथंया गुनासो मदु धासें थम्हं पार्टी दुने छुं कथंया तं नं मप्वंकागु खँ वय्कलं कनादिल ।

अथे खःसां छुं अनलाइनतय्सं पत्रकार सिबें नं कथाकार जुयाः थम्हं अथे यात थथे यात धकाः थः यःयःथे घटना सिर्जना यानाः समाचार च्वया हयाच्वंगु खँ कँसें उकियात वय्कलं खण्डन नं यानादिल ।थः मन्त्री मजूसां पार्टीया भागय् लाःगु मन्त्रालय मार्फत नेवाःतय् हित जुइगु ज्या धाःसा थम्हं यानां च्वनेगु बचं धाःसा वय्कलं बियादिल ।