सीमा समस्या कूटनितिक माध्यमं जुइ : परराष्ट्रमन्त्री

येँ – परराष्ट्रमन्त्री प्रदीप ज्ञवालीं भारत नापया सीमा समस्या कूटनीतिक माध्यमं हे यायेफइ धाइगु खँय् सरकार विश्वसत दुगु खँ धयादीगु दु ।

प्रतिनिधिसभाया मुँज्याय् न्ववायेगु झ्वलय् मन्त्री ज्ञवालीं नेपालं न्ह्यागू लेभलया वार्ता यायेत नं तयार दुगु जानकारी भारतया बियाच्वंगु धयादिसें फेब्रुअरीइ वार्ताया निंतिं तयारी जूगु खःसां जुइमफुगु जानकारी बियादिल ।

म्हिगः जक भारतीय विदेश मन्त्रालयया प्रवक्तां कोरोनाया महामारी लिपा वार्ता यायेत तयार दुगु खँ न्ह्यथंगु धयादिसें मन्त्री ज्ञवालीं निगू देय् दथुइया कूटनीतिक वार्ता मार्फत थ्व समस्याया हल पिहांवइगु विश्वास प्वंकादिल ।

भारतं नेपाःया लँपु जुयाः निर्माण यानाच्वंगु सतकया बारे सरकारयात जानकारी दुगु खः की मखु धकाः सांसदतय्सं न्यंगु न्ह्यसलय् मन्त्री ज्ञवालीं धयादिल, ‘थ्व खँ सरकारं मसीगु खँ हे मजुल ।’

भारतं सन् २००५य् सतकया निर्माण्या योजना दयेकूगु, २००८य् सतक निर्माण सुरु याःगु व २०१४य् निर्माणयात तीव्रता बिउगु जानकारी नं मन्त्री ज्ञवालीं संसदयात जानकारी याकादिल । वय्कलं कोरोनां मानवीय संकट हयाच्वंगु इलय् जःलाखला राष्ट्रया संवेदनशीलताय् न्ह्यसः थनीगु कथं गतिविधि यायेमजिउगु धयादिल ।

थ्वस्वयां न्ह्यः आइतवाः हे अन्तर्राष्ट्रिय सम्बन्ध समितिया मुँज्याय् मन्त्री ज्ञवालीं भारतं लिप्पांगु इलय् नेपाःया १९ किलोमिटर भूभाग मिचे याःगु जानकारी बियादीगुु खः ।