ने. सं. ११४३ चौलाथ्व पारू -

नेपाल संवत् ११४२ न्हूदँ देयन्यंकं तःजिक हन (किपा स्वयादिसँ)

येँ– नेपाल संवत् ११४२ न्हूदँ देय्न्यंकं थीथी ज्याझ्वः यासें तःजिक हन । स्वनिगःया येँ, यल, ख्वप, किपू, थिमि लिसें स्वनिगः पिने हेटौंडा, पोखरा, बनेपा, दमौली, धादिङ, लमजुङ, म्याग्दी आदि थीथी थासय् थीथी ज्याझ्वः यासें न्हूदँ हंगु दु ।

येँ, यल, थिमि, ख्वप, किपू,हेटौंडाय् न्हूदँया लसताय् ¥याली न्ह्याःगु खः । न्हूदँया लसताय् येँ,यल व थिमि जूगु ज्याझ्वलय् प्रधानमन्त्री शेरबहादुर देउवा मूपाहाँ कथं झायादिल । नेपाल संवत् न्हूदँ राष्ट्रिय समारोह समितिया ग्वसालय् येँय् जूगु ज्याझ्वलय् न्ववानादिसें प्रधानमन्त्री देउवां नेपाल संवत्या प्रवर्तक शंखधर साख्वालं गरिबी उन्मूलनया अभियान न्ह्याकाः नेपाल संवत्या प्रचलन सुरु यासें समाजय् शान्ति स्थापना, नेपाःमिया स्वतन्त्रता व स्वाभिमान थकायेत योगदान याःगु खँ कनादिल ।

थ्व झ्वलय् वय्कलं राष्ट्रिय विभुति शंखधर साख्वाःया अतुलनीय योगदानया जनस्तरय् प्रचार प्रसार यायेमाःगु व नेपाल संवत्या ऐतिहासिकता, व्यावहारिकता व सांस्कृति महत्वया विविध पक्षबारे आमनागरिकयात जानकारी बिइमाःगु खँ कनादिल ।

*यलय् सांस्कृतिक रयालीया उलेज्या यासें प्रधानमन्त्री*

अथेहे यलय् सांस्कृतिक ¥यालीया उलेज्या यानादिसें प्रधानमन्त्री देउवां संघीय लोकतान्त्रिक गणतन्त्रयात संस्थागत यासें नेपाल संवत्या सांस्कृतिक महत्वयात प्रवद्र्धन यायेत सरकारं माःगु पलाः न्ह्याकी धयादिल ।

यलय् दँय्दसं थीथी जातीय संस्थाया संयोजनय् न्हूदँया ¥याली जुया वयाच्वंगु दु । थ्व झ्वलय् थुगुसी देउला समाजया संयोजनय् नेपाल खड्गी समाजया सह संयोजनय् मंगलबजारं न्हूदँया सांस्कृतिक ¥याली न्ह्याःगु खः ।

थिमिइ राष्ट्रिय विभुति शंखधर साख्वाः प्रतिष्ठानया ग्वसालय् थिमिया शंखधर चोकय् जूगु ज्याझ्वलय् प्रधानमन्त्री देउवां शंखधर साख्वाःया झ्वातालय् स्वांमाः क्वखायेकादिसें नेपाल संवत् एप व न्हूदँ क्यालेन्डर सार्वजनिक यानादीगु खः । ज्याझ्वलय् न्ववानादिसें वय्कलं नेपाल संवत् राष्ट्रिय संवत् जूगुलिं थुकियात व्यवहारय् लागू यानायंकेमाःगु खँय् बः बियादिल ।

ज्याझ्वलय् शंखधर सिरपाः समितिया नायः आर. के. मानन्धरं प्रतिष्ठानया अध्यक्ष चन्दनकृष्ण श्रेष्ठयात निगू किलो वहया शंखधर साख्वाःया मूर्ति लःल्हानादीगु खः । प्रतिस्थानं थुगुसी संस्थागत पाखे नेपाल पञ्चाङ निर्णयक समिति व व्यक्तिगतपाखे मध्यपुर थिमिया पुलांम्ह मेयर व प्रतिस्थानया संस्थापक नायः मदनकृष्ण श्रेष्ठयात हंगु खः ।

नेपाल संवत् न्हूदँया लसताय् गोदावरी नगरपालिका १४ वडाया ग्वसालय् भिंतुना देछायेगु व ¥याली जूगु खः । ज्याझ्वलय् न्ववानादिसें उर्जा, जलस्रोत तथा सिँचाइ मन्त्री पम्फा भुसालं नेपाल संवत् नेवाः समुदायपाखें उत्पन्न जूगु खःसां थ्व सकलें नेपाःमितय् निंतिं मौलिक संवत् जूगु खँ धयादिल ।

हेटौडाय् ¥याली

नेपाल संवत् ११४२ न्हूदँया लसताय् हेटौंडाय् नेपालभाषा खलः व नेवाः संस्कृतिक पुचःया मंकाः ग्वसालय् सांस्कृतिक ¥याली जुल । ¥याली लिपा हेटौडाया पिपलबोटय् छगू ज्याझ्वः नं जूगु खः । ज्याझ्वलय् नेवाः समुदायया लिसें स्थानीय समाजसेवी, बुद्धिजीवी, थीथी राजनीतिक दलया प्रतिनिधिपिनि सहभागिता दुगु खः ।

दमौली न्हूदँय ज्याझ्वः

*दमाैलीइ ज्याझ्वःया उलेज्या यासें मन्त्री श्रेष्ठ*

न्हूदँ ११४२ या लसताय् दमौली भिंतुना कालबिल ज्याझ्वः जुल । नेवाः देय् दबू गुथि समन्वय समितिया ग्वसालय् जूगु ज्याझ्वलय् न्ववानादिसें श्रम, रोजगार तथा सामाजिक सुरक्षामत्री कृष्णकुमार श्रेष्ठं संस्कृति व संस्कार संरक्षण याना वनेमाःगु खँ धयादिल । नेवाः समुदाय दुने संस्कृति तना वनाच्वंगु खँ न्ह्यथनादिसें वय्कलं भावी पुस्तायात नेवाःतय् संस्कृति, संस्कार स्यना यंकेमाःगु खँ धयादिल ।