ज्यापु महागुथिया शैक्षिक परामर्श ज्याझ्वः
येँ- एसइइ परीक्षा बियाः रिजल्ट पियाच्वंपिं विद्यार्थीतय् निंतिं शैक्षिक परामर्श ज्याझ्वः जुल । ज्यापु महागुथि नेपाः येँ महानगर समितिया ग्वसालय् उगु परामर्श ज्याझ्वः जूगु खः ।
एसइइ परीक्षा बियाः रिजल्ट पियाच्वंपिं ज्यापु समुदायया विद्यार्थी व अभिभावकतय्त लक्षित यानाः उगु परामर्श ज्याझ्वः ग्वसाः ग्वःगु खः ।
विद्यार्थीतय्त शैक्षिक परामर्श व अभिभावकयात कुशल अभिभावकत्वया बारे परामर्श बीगु ज्या जूगु ज्याझ्वलय् परामर्श दाता इन्द्र गुरुङ व राजेश्वरी श्रेष्ठ गुरुङं परामर्श बियादीगु खः ।
ज्याझ्वलय् परामर्श दाता गुरुङं विद्यार्थीतय् जीवनय् एसइइ परीक्षा छगू महत्वपूर्ण ई खः धासें वयाः लिपा उच्च शिक्षाया निंतिं न्ह्याः वनेत विद्यार्थीलिसें अभिभावकया नं महत्वपूर्ण भूमिका दइ धयादिल ।
वय्कलं अभिभावकतय्त फक्व अप्वः ई मस्तय् निंतिं बीत इनाप यासें मस्तलिसे गाक्क खँल्हाबल्हा यानाः आवश्यक सल्लाह सुझाव बीत इनाप यानादिल ।
लिसें वय्कलं विद्यार्थीतय्त मेपिनिगु खँ न्यनाः विषय मल्ययेत व थःगु इचछा, चाहना, कार्य कुशलता व क्षमताया लिधंसाय् शैक्षिक यात्रा न्ह्यःने यंकेत नं सुझाव बियादिल ।
ज्याझ्वःया संयोकज दिनेश महर्जनं एसइइया परीक्षार्थीतय् निंतिं थुकथंया शैक्षिक परामर्श ज्याझ्वः जूसां कुशल अभिभावकत्वया निंतिं तालिम धाःसा खास हे जुयाच्वंगु मदु धयादिल ।
एसइइ लिपा विषय छनोट यायेगु खँय् विद्यार्थीत थः हे गम्भिर जुइमाः धासें अभिभावकं नं आवश्यक सुझाव बियाः सही मार्ग निर्देश यायेमाःगु खँय् बः बियादिल
ज्याझ्वलय् काठमाडौं बर्नहार्ट कलेजया उपप्राध्यापक सुरज शिवाकोटी व समृद्धि कलेजया प्रधानाध्यापक नरेश श्रेष्ठं विद्यार्थीतय्त भिंतुना बियादिसें थःगु नं नुगःखँ तयादीगु खः ।
LEAVE YOUR COMMENTS